ԱՄՆ-ը կվերանայի Սիրիայի իրավիճակի նկատմամբ իր դիրքորոշումը, եթե հաստատվի, որ այդ երկրի կառավարությունն իր սեփական քաղաքացիների դեմ քիմիական զենք է օգտագործել: Այս մասին այսօր հայտարարել է ԱՄՆ նախագահ Բարաք Օբաման Սպիտակ տանը կայացած մամլո ասուլիսի ժամանակ:
«Մենք տեղեկատվություն ունենք այն մասին, որ Սիրիայում քիմիական զենք է կիրառվել, սակայն մենք հստակ չգիտենք՝ երբ, որտեղ և ով է այն կիրառել»,- ասել է Օբաման: Այդ կապակցությամբ ԱՄՆ-ը չի շտապում եզրակացություններ անել և այլ երկրների հետ միասին շարունակում է հետաքննություն անցկացնել՝ փաստեր ձեռք բերելու նպատակով:
«Եթե հաստատվի, որ Ասադի ռեժիմն է կիրառել քիմիական զենքը, դա կփոխի Սիրիայի իրադրության հետ կապված մեր դիրքորոշումը»,-ասել է Օբաման: Հստակեցնելով, թե ինչ նկատի ունի «դիրքորոշման փոփոխություն» ասելով՝ երկրի նախագահն նշել է, որ այդ դեպքում «ԱՄՆ-ը կվերանայի Սիրիայում իր գործողությունների տարբերակները»: «Պենտագոնին հանձնարարվել է այդ կապակցությամբ առաջարկություն մշակել»,- նշել է ԱՄՆ նախագահը:
