Այսօր Սիվիլիթաս հիմնադրամը հրավիրել էր բանավեճի՝ «Երևանի ավագանու ընտրությունները» թեմայով: Հիմնական հարցերն էին՝ ի՞նչ սպասելիքներ կան մասնակցող կուսակցություններից, ի՞նչ է ուզում Երևանի բնակիչը և ի՞նչ ծրագրեր ունեն կուսակցությունները:
Բանավեճին կոալիցիոն կուսակցությունները՝ ՀՀԿ-ն ու ՕԵԿ-ը հրաժարվել էին մասնակցել:
Բանավեճի գրեթե ավարտին «Մոսկվա» կինոթատրոն է գալիս ԱԺ ՕԵԿ պատգամավոր Հովհաննես Մարգարյանը: Նա նշել է, որ 20 րոպե այստեղ էր, սակայն իրեն ներս չէին թողնում` պատճառաբանելով, որ արդեն հաղորդումն ավարտվել է և հետո, իրենց ասել էին, թե քննարկումը «Անի պլազա» հյուրանոցում է լինելու: Հովհաննես Մարգարյանն ասել է, որ ՕԵԿ ցուցակը գլխավորող Արմեն Երիցյանն այս պահին հանդիպման է, իրենք կիսում են հնչած մտահոգությունները, պատրաստ են իրենց մասնակցությունն ունենալ իրենց փորձված, հզոր թիմով: Դահլիճում հավաքված քաղաքացիները, որոնք հարցեր էին ուղղում թեկնածուներին, պահանջել են իշխանության թեկնածուից պատասխանել իրենց հարցերին` կապված կանաչ տարածքների, ապօրինի շինությունների և մնացածի հետ:
Բայց քանի որ քննարկմանը մասնակցում էին ցուցակների առաջին հորիզոնականները զբաղեցնող անձինք, ուստի այն շարունակվել է նույն ֆորմատով:
