Առողջապահության համաշխարհային կազմակերպությունը (ԱՀԿ) աշխարհում առաջին անգամ հրապարակել է քրոնիկական, ինչպես նաև ոչ ինֆեկցիոն հիվանդությունների տարածվածության մասին գլոբալ հաշվետվություն:
Դրանում նշված է, որ վիճակագրական տվյալներով, 2008 թվականին տարբեր հիվանդությունների պատճառով մահացել է 57 միլիոն մարդ, որից 36 միլիոնը (63 տոկոսը) քրոնիկական հիվանդություններից: Վերջինիս 17 միլիոնը բաժին է ընկնում սրտային հիվանդություններին, 7.6 միլիոնը` քաղցկեղին, 4.2 միլիոնը` շնչուղիների հիվանդություններին, 1.3 միլիոնը` շաքարախտին:
ԱՀԿ-ն նշում է, որ մահացության այդ դեպքերի մեծ մասը կարելի էր կանխել: Այդ հիվանդություններից մահացության 4 ընդհանուր պատճառներն են.
1. Ծխախոտ (թոքերի քաղցկեղի 71 տոկոս, շնչուղիների հիվանդությունների 42 տոկոս, սրտանոթային հիվանդությունների 10 տոկոս)
2. Հիպոդինամիա (տարեկան 3.2 միլիոն մարդ է մահանում ֆիզիկական ակտիվության բացակայության պատճառով)
3. Սպիրտային խմիչքների չարաշահում (տարեկան մահանում է 2.5 միլիոն մարդ)
4. Սննդային խնդիրների կարևորության չգիտակցում (ավելորդ քաշի պատճառով տարեկան մահանում է 2.8 միլիոն մարդ)
Մարդու կյանքի վրա այս 4 պատճառների ազդեցության թուլացումը կամ վերացումն առաջին հերթին կախված է հենց իրենից` մարդուց:
Բացի այդ, ԱՀԿ-ն այդ հիվանդությունների դեմն առնելու համար բոլոր երկրներին 10 պատգամ է հղել.
1. Մարդկանց հեռու պահել ծխախոտից, արգելել ծխելը հասարակական վայրերում
2. Մարդկանց կանոնավոր զգուշացնել ծխելու վնասակարության մասին
3. Արգելել ծխախոտի գովազդը
4. Ավելացնել ծխախոտի վրա դրված հարկերը
5. Սպիրտային խմիչքների վաճառքի վրա սահմանափակումներ մտցնել
6. Արգելել ալկոհոլի գովազդը
7. Ավելացնել ալկոհոլի վրա դրված հարկերը
8. Նվազեցնել սննդամթերքի մեջ աղի քանակությունը
9. Սննդամթերքի մեջ կենդանական յուղերը փոխարինել բուսական յուղերով
10. Քարոզել դիետա և ֆիզիկական ակտիվություն
