Այսօր լրագրողների հետ հանդիպմանը «Ժառանգության» առաջնորդ Րաֆֆի Հովհաննիսյանը պատասխանելով այն հարցին, թե՝ ինչպե՞ս է վերաբերվում այն հանգամանքին, որ Հայ ազգային կոնգրեսը վերջին շրջանում քննադատում է իրեն, ասաց. «Ինձ համար արդեն սովորական է, որ տարբեր կուսակցություններ իրենց թիրախ են ընտրել ինձ»:
«Բարև»-ի առաջնորդն անդրադարձավ նաև «Բարգավաճ Հայաստան»-ի կողմից հնչող այն կարծիքներին, թե նա նախագահական ընտրություններին այդքան շատ ձայն հավաքեց, որովհետև չէին մասնակցում իրենք, իսկ այս ընտրություններին պատկերը այլ կլինի: «Ես կարծում եմ՝ այն ուժերը, որոնք նախկինում չեն մասնակցել, հիմա էլ կստանան քվե: Մեկն ունի վարչական ռեսուրս՝ ուսուցիչներ, բժիշկներ, մյուսը՝ փող, բայց կտեսնենք, որ մայիսի 5-ին ազատ ընտրությունների դեպքում «Բարև Երևանը» կգրանցի հաղթական արդյունք»,- ասաց նա:
Նախագահական ընտրությունների արդյունքում պաշտոնական տվյալներով երկրորդ տեղը զբաղեցրած նախկին թեկնածուն կրկին անդրադարձավ ապրիլի 9-ի իրադարձություններին և այն քննադատություններին, որոնք առնչվում են Վլադիմիր Գասպարյանի հետ աղոթելուն՝ ասելով. «Գաղտնիք չէ, նախապես հայտարարվել էր՝ գնում ենք Ծիծեռնակաբերդ Բաղրամյան 26-ի ճանապարհով, և եթե ոստիկանապետը որոշեց անձամբ ներկայանալ Պռոշյան-Դեմիրճյան խաչմերուկում և դրանից հետո Բաղրամյանի մուտքի մոտ, դա արդեն իր որոշումն է, ինչը խոսում իր և իր որակների մասին: Առանց մեծ զոհերի անցավ, ճիշտ է՝ Արմենուհին մի փոքր տրորվեց, Ա. Մարտիրոսյանի քիթը ջարդվեց, բայց մենք զոհ չտվեցինք այդ օրը»:
Լուսանկարը՝ PanARMENIAN Photo-ի
