Բրիտանացի արքայազն Ուիլյամի հղի կինը՝ Քեյթ Միդլթոնը, շշուկների նոր ալիք է առաջացրել իր ապագա երեխայի սեռի առնչությամբ: Այս մասին հայտնում է Daily Mail-ը:
Պարբերականի տվյալներով՝ վերջերս ունեցած ընդունելության ժամանակ Քեմբրիջի դքսուհին, զրուցելով զինծառայողների կանանց հետ, պատմել է, որ բաց կապույտ մանկասայլակ է գնել:
Պարբերականն ընդգծում է, որ Bugaboo ապրանքանիշն առաջարկում է տարբեր գույնի մանկասայլակներ: Այն զույգերը, որոնք չեն իմանում ապագա երեխայի սեռը, սովորաբար չեզոք գույներ են ընտրում՝ սև, կաթնագույն և այլն, սակայն կապույտ գույնը նշելը առիթ է տվել ենթադրելու, որ Քեմբրիջի դուքսն ու դքսուհին որդի են ունենալու:
Ավելի վաղ տեղեկություններ էին տարածվել, որ զույգն աղջիկ երեխայի է սպասում:
Քեյթն ու Ուիլյամը պնդում են, թե չգիտեն երեխայի սեռը: Թեև նրանք ներկայում տեղյակ են այդ մասին,սակայն պահպանում են մինչ երեխայի ծնունդը այդ մասին չխոսելու թագավորական ավանդույթը:
Նշենք, որ երեխայի ծնունդից հետո Քեյթը մտադիր է մի քանի շաբաթ տեղափոխվել ծնողների մոտ:
