Վենեսուելայի նախագահ Նիկոլաս Մադուրոն շաբաթ օրը Հավանայում 5 ժամ տևողությամբ հանդիպում է ունեցել Կուբայի հեղափոխության առաջնորդ Ֆիդել Կաստրոյի հետ, որի ընթացքում նրանք հիշել են Վենեսուելայի հանգուցյալ նախագահ Ուգո Չավեսին և քննարկել երկկողմ համագործակցությանը վերաբերող հարցեր: Այս մասին հայտնում է RIA Novosti-ն:
Մադուրոյի խոսքով՝ իրենք միասին հիշել են, թե ինչպես են Կաստրոն և Չավեսը կարողացել կապ ստեղծել երկու երկրների միջև, որը դուրս էր ռազմավարական դաշինքի շրջանակներից:
Մադուրոն Ֆիդել Կաստրոյին անվանել է Լատինական Ամերիկայի «անհաղթահարելի կոմանդանտե», որից փորձ է ձեռք բերել նաև Չավեսը:
Մադուրոն Կուբա էր ժամանել շաբաթ երեկոյան՝ մասնակցելու համատեղ հանձնաժողովի հանդիպմանն ու հաստատելու երկու երկրների միջև ռազմավարական հարաբերությունները: Հանձնաժողովի աշխատանքի ընթացքում ստորագրվել են համաձայնագրեր գյուղատնտեսության, կրթության, առողջապահության, էներգետիկայի, սոցիալական ենթակառուցվածքների, ինֆորմատիկայի և կապի ոլորտներում:
Վենեսուելայի և Կուբայի միջև տարեկան առևտրաշրջանառությունը գերազանցում է 8 մլրդ դոլարը:
