ԵՄ երկրների մշտական ներկայացուցիչները հետաձգել են Ռուսաստանի դեմ տնտեսական պատժամիջոցների երկարաձգման հարցի քննարկումը: Այս մասին հաղորդում է France Press-ը՝ վկայակոչելով դիվանագիտական աղբյուրներին:
Նախատեսվում էր, որ ԵՄ երկրների ներկայացուցիչները չորեքշաբթի օրը առանց քննարկման 6 ամսով կերկարաձգեն հակառուսական պատժամիջոցները՝ կապված Ուկրաինայի հակամարտության հետ: Սակայն ըստ դիվանագիտական աղբյուրի՝ «այդ կետը հեռացվել է օրակարգից»:
«Այդ ամենը առկախված վիճակում է… Հարցն այն է, թե որոշումը որտեղ պետք է ընդունվի, ոմանք ցանկանում են, որ դա տեղի ունենա ԵՄ երկրների առաջնորդների գագաթնաժողովին՝ հաջորդ շաբաթ»,- ասել է աղբյուրը՝ հավելելով, որ դրան կողմ է Իտալիան:
Զրուցակիցը հստակեցրել է, որ հաջորդ քայլի կապակցությամբ կա որոշակի միջամտություն:
«Դա կախված է իտալացիներից, ովքեր սպասւոմ են Ռենցիի (Իտալիայի վարչապետ) որոշմանը: Հնարավոր է՝ այդ հարցը նորից բարձրացվի այսօր կամ վաղը, կամ այն կքննարկվի արտաքին գործերի նախարարների հանդիպմանը՝ երկուշաբթի»,- գործակալությանը հայտնել է աղբյուրներից մեկը:
