Բոստոնի մարաթոնի ժամանակ գործարկված պայթուցիկ սարքերը եղել են ռադիոկառավարվող: Այս մասին հայտնում է Associated Press-ը՝ հղում անելով հետաքննությանը մոտ անանուն պաշտոնյաներին: Գործակալությունը նշում է, որ մեխանիզմը ռադիոկառավարվող խաղալիք է հիշեցնում:
Քննիչները պայթյունների վայրում գտել են հեռակառավարման վահանակի բեկորներ: Ուսումնասիրության արդյունքում եզրակացություն է արվել, որ ռումբերի կառավարումն իրականացվել է ոչ մեծ հեռավորությունից:
Ենթադրվում է, որ ռումբերը կարող էին կառավարվել բջջային հեռախոսի օգնությամբ: Գործի նյութերում նշվում է, որ պայթյունների մեկնարկից րոպեներ առաջ Ջոհարի ձեռքում բջջային է եղել:
AP-ի աղբյուրները նշում են, որ կրտսեր Ցարնաևը ձերբակալման պահին անզեն է եղել: Ավելի վաղ հաղորդվում էր, որ Ջոհարի ձերբակալությանը նախորդել է փոխհրաձգությունը:
Նշենք, որ ամերիկացի քննիչների խումբը Դաղստանում է՝ զրուցելու Ցարնաև եղբայրների ծնողների հետ և փորձելու պարզել նրանց արարքի դրդապատճառները: Եղբայրների հայրը՝ Անզոր Ցարնաևը, հայտնել է ԱՄՆ ուղևորվելու և ավագ որդու՝ Թամերլանի դին Ռուսաստան տեղափոխելու մտադրության մասին: