«Կյանքը պայքար է, արդար պայքար է, յուրաքանչյուրն իր ձևով է պայքարում, և սպասել արդարության ՝ մատը մատին չխփելով այդ արդարությունը հաստատելու համար, այդքան էլ ճիշտ չէ»,- «Առաջին լրատվական»-ի հետ զրույցում նշեց Տիկնիկային թատրոնի տնօրեն Ռուբեն Բաբայանը՝ անդրադառնալով այն փաստին, որ քաղաքացիների մոտ պասիվություն է նկատվում քվեարկությանը մասնակցելու գործընթացում:
Անդրադառնալով արդեն արձանագրված ընտրախախտումներին՝ Ռ. Բաբայանը նշեց. «Դժվար է հավատալ, որ մի օրում կարող է փոխվել ավանդույթը, որը ձեռք ենք բերել 25 տարվա ընթացքում, բայց կարևորն այն է, թե հասարակությունը և պատկան մարմիններն ինչպես կարձագանքեն խախտումներին: Արդարությունը ոչ թե օրենքի խախտման բացակայության մեջ է կայանում, այլ օրենքի ուժը կիրառելու և արդարությունը վերականգնելու մեջ:
Մեզ կաշառեցին, մեզ վախեցրին. այսպիսի արդարացումները Ռ. Բաբայանի համար անընդունելի են. «Այսօրվա կյանքը, անկախ ամեն ինչից, մեզ տալիս է հնարավորություն մարդ մնալու: Պետք չէ սեփական թուլությունները բարդել ուրիշների վրա»:
«Մենք խանգարում ենք մեր երիտասարդությանը՝ մեր կարծրատիպերով, մեր վախերով, կյանքի հանդեպ հավատ չունենալով: Կյանքը լավատեսություն է, լուսավոր գաղափար. մարդը իր կյանքը կազմակերպում է դրանից ելնելով, այլ ոչ թե յոլա տանելով: Չի կարելի երիտասարդներին դեմքով միշտ դեպի անցյալ շրջել և ասել, որ ապագա չկա, դու զբաղվիր միայն անցյալով: Այդ տեսակետից մենք հանցանք ենք կատարում: Մենք կարող ենք միայն օգնել երիտասարդներին, և ոչ թե փոխարինել կամ խանգարել»,- նշեց Ռուբեն Բաբայանը:
Մանրամասները՝ տեսանյութում:
