Առաջին նախագահ Լևոն Տեր-Պետրոսյանը երեկ, խախտելով տևական լռությունը, հանդես է եկել ծավալուն հարցազրույցով, որտեղ ևս մեկ անգամ շեշտում է. «Սահմանադրական բարեփոխումների փաթեթն իրականում ոչ այլ ինչ է, եթե ոչ նոր սահմանադրության նախագիծ»։ Տեր Պետրոսյանի դիտարկմամբ խոսքը վերաբերում է ոչ թե առանձին դրույթների մասնակի ճշգրտումներին ու լրացումներին, այլ Հայաստանի պետական կառուցվածքի արմատական վերափոխմանը։
Լևոն Տեր-Պետրոսյանը դեռևս հույս է փայփայում, որ Սերժ Սարգսյանը, պետական մտածողություն դրսևորելով, ի զորու է թեկուզ ժամանակավորապես կասեցնել նոր սահմանադրության ընդունման գործընթացը, իսկ եթե դա այլևս անհնար է, ապա Տեր-Պետրոսյանը հորդորում է գոնե հրաժարվել ամեն գնով հանրաքվեի արդյունքները կեղծելու և դրանով ռեժիմի ու հասարակության միջև գոյություն ունեցող անջրպետն ավելի ևս խորացնելու մտքից։
«Նոր Հայաստան» հանրային փրկության ճակատի ներկայացուցիչ Վարուժան Ավետիսյանը, մեզ հետ զրույցում անդրադառնալով առաջին նախագահի հոդվածին, նշեց. «Մենք պետք է ընդունենք այն իրողությունը, որ այս կառավարման համակագը և այն ստեղծած ու մինչ օրս կառավարող քաղաքական վերնախավը ձևավորվել են դասական գաղութից և հիմա դեպի նոր գաղութային վիճակ ընթանալու ճանապարհին են»։ Այս կոնցեպտը նրա խոսքերով՝ արդեն սպառվել է, դատողություններ պետք է անենք հենց դրանից ելնելով։
«Ժառանգություն» կուսակցության առաջնորդ Րաֆֆի Հովհաննիսյանն իր հերթին երեկ հրավիրված մամլո ասուլիսի ընթացքում ընդգծեց՝ ինքը նման կոչով և խնդրանքով չի դիմի Սարգսյանին:
Քաղաքական և ընտրական տեխնոլոգիաների փորձագետ Արմեն Բադալյանը մեզ հետ հեռախոսազրույցում նշեց, որ Տեր-Պետրոսյանի հորդորն ու կոչը որևէ ազդեցություն չեն ունենալու իշխանությունների դիրքորոշման վրա, և նրանք ոչ մի դեպքում չեն կասեցնի սահմանադրական փոփոխությունների նախագիծը։ Առավել ևս, ըստ Բադալյանի, չեն հայտարարի, որ Տեր-Պետրոսյանի հորդորից հետո արդեն արդար և թափանցիկ ընտրություններ են անցկացնելու։