Փախստականների աննախադեպ հոսքը Եվրոպա հարցականի տակ է դնում շենգենյան համաձայնագրի երկրների միջև բաց սահմանների գոյությունը՝ կարծում է Եվրախմբի նախագահ Յերուն Դեյսելբլումը: Շենգենյան համակարգը ներկայիս տեսքով պահպանելու հնարավորություններն այնքան էլ բարձր չեն՝ ասել է Դեյսելբլումը գերմանական Handelsblatt թերթին տված հարցազրույցում:
«Մենք չենք կարող երկար ժամանակ պահել մեր սոցիալական պետությունը, եթե փախստականների հոսքը պահպանվի ներկայիս մակարդակի վրա»,- նշել է նա: Դեյսելբլումի խոսքով՝ ներկայումս ԵՄ երկրների միջև պակասում է համերաշխությունն ու քաղաքական կամքը փախստականների հետ կապված ծանրաբեռնվածության արդարացի բաշխման և արտաքին սահմանների ավելի արդյունավետ պաշտպանության հետ կապված հարցերում:
Եթե իրավիճակը չփոխվի, մի շարք երկրներ, մասնավորապես՝ Նիդերլանդները, Գերմանիան, Շվեդիան, Ավստրիան և Բելգիան ստիպված կլինեն յուրատեսակ «մինի-Շենգեն» ստեղծել՝ ենթադրել է քաղաքական գործիչը: Սակայն դա կլինի ոչ ամենաօպտիմալ լուծումը և քաղաքական ու տնտեսական բացասական հետևանքներ կունենա բոլոր եվրոպացիների համար՝ նշել է Դեյսելբլումը:
