Մոսկվան հաստատում է, որ Սիրիայում ռուսական «Սու-24» ռմբակոծիչը խփած թուրքական կողմի գործողությունները լուրջ հետևանքներ կունենան երկկողմ հարաբերությունների համար և անարձագանք չեն մնա: RIA Novosti-ի հաղորդմամբ՝ այս մասին ասվում է ՌԴ ԱԳՆ-ի հինգշաբթի տարածած հաղորդագրության մեջ:
Ռուսական արտաքին քաղաքական գերատեսչության տեղեկությամբ՝ նոյեմբերի 25-ին Կոպենհագենում տեղի է ունեցել Ռուսաստանի ԱԳՆ ղեկավարի առաջին տեղակալ Վլադիմիր Տիտովի և Դանիայի ԱԳՆ ղեկավար Քրիստիան Յենսենի հանդիպումը, նաև խորհրդակցություններ՝ դանիական նախարարության ստատս-քարտուղարի հետ:
«Միջազգային խնդիրների քննարկման շրջանակներում ռուսական կողմից մանրամասն գնահատականներ են տրվել դեպքին, երբ թուրքական ռազմաօդային ուժերը Սիրիայում խփել են ռուսական «Սու-24» ինքնաթիռը: Ընդգծվել է Թուրքիայի գործողությունների ակնհայտորեն միտումնավոր և սադրիչ բնույթը, որոնք լուրջ հետևանքներ կունենան երկկողմ հարաբերությունների համար և անարձագանք չեն մնա»,- ասվում է ՌԴ ԱԳՆ հաղորդագրության մեջ:
