Korrespondent.net-ի փոխանցմամբ՝ համացանցում է հայտնվել նոյեմբերի 13-ին Փարիզի ահաբեկչությունների վերաբերյալ Eagles of Death Metal խմբի տված հարցազրույցի ամբողջական տարբերակը։ Դրանում երաժիշտները պատմում են այն իրադարձությունների մասին, երբ ահաբեկիչները խմբի ելույթի ժամանակ ներխուժել են համերգասրահ ու սկսել կրակել։
Խմբի մենակատար Ջեսի Հյուզը պատմել է, որ կրակոցների սկսվելուց անմիջապես անց նետվել է փնտրելու իր ընկերուհուն։ Նա մոտեցել է մուտքի դռանը և տեսել է կրակող մարդուն։ Նա հասկացել է, որ դահլիճում գտնվող մարդիկ վազում են իր հետևից, ինչի համար էլ շրջվել է և մարդկանց սկսել է վանել համերգի դռնից:
«Ես մոտեցա պահեստային ելքին, սակայն չկարողացա գտնել Թյուզդեյին (ընկերուհուն), և երբ լսեցի նրա ձայնը, հասկացա, որ նրա մոտ ամեն ինչ կարգին է, ես դուրս եկա փողոց»,- պատմել է նա։
Հյուզի խոսքով՝ փողոցում մարդիկ պարզապես կանգնել են և չեն շարժվել, և այդ ժամանակ խմբի անդամներից մեկը գոռացել է՝ «Փախե՛ք», որպեսզի մարդկանց հարկադրի փրկվել ահաբեկիչներից։
Խմբի մեկ այլ անդամ էլ պատմել է, որ կանգնած է եղել դահլիճի ամենավերջում, երբ իր հետևում լսել է կրակոցի ձայներ, ինչից հետո տեսել է, թե ինչպես են մարդիկ ընկնում հատակին. «Ես տեսա, թե ինչպես կրակողը նայեց ուղիղ վրաս, նշան բռնեց ու կրակեց, սակայն վրիպեց։ Ամենուրեք արյուն էր, սակայն ահաբեկիչը կանգնած վիճակում շարունակում էր կրակել ու կրակել, սպանել մարդկանց ու ողջ ուժով գոռալ «Ալլահ Աքբար»»։
