«Առաջին լրատվական»-ի զրուցակիցն է ԱԺ տնտեսական հարցերով մշտական հանձնաժողովի նախագահ Վարդան Այվազյանը:
– Պարոն Այվազյան, Դուք մասնակցում եք «Այո»-ի և «Ոչ»-ի ռեալիթի շոուին: Մարզերում բնակիչների հետ հանդիպման ժամանակ նրանց մոտ ի՞նչ տրամադրվածություն եք զգում սահմանադրական փոփոխությունների նկատմամբ:
– Կան թե՛ «այո»-ի, թե՛ «ոչ»-ի կողմնակիցներ: Այնպես չէ, որ համատարած «ոչ» է, կամ՝ համատարած «այո»: Իսկ այդ հանդիպումների ժամանակ մեր իրականացրած ամենակարևոր խնդիրն այն է, որ ազգաբնակչությանն իրազեկում ենք այդ փոփոխությունների մասին: Դրանից հետո արդեն նրանք կկարողանան կողմնորոշվել:
– Իսկ ձեր այդ իրազեկման ակցիաները չե՞ն վերածվում սոցիալական խնդիրների բարձրացման, սոցիալական պահանջների ներկայացման միջոցառումների:
– Չկա որևէ մի տեղ, որ մենք սոցիալական խնդիրների հետ չառնչվենք: Մարդիկ իրենց առաջին գերխնդիրը համարում են իրենց սոցիալական խնդիրների լուծումը: Ժողովուրդն ակնկալում է իր սոցիալական խնդիրների առաջնահերթ լուծումը:
– Ըստ երևույթին նրանց հետաքրքրում է, թե այդ փոփոխություններն իրենց սոցիալական վիճակի վրա ազդեցություն կունենա՞ն, թե՞ ոչ: Դուք էլ հավանաբար վստահեցնում եք, որ դրակա՞ն արդյունք կունենան:
– Բնականաբար: Բայց այնպես չէ, որ այսօր Սահմանադրությունը փոխեցինք, վաղը չէ մյուս օրը մեր հարցերը միանգամից լուծվելու են: Բոլոր դեպքերում մենք ասում ենք, թե նպատակային, արդյունավետ օգտագործումը բերելու է սոցիալական խնդիրների լուծմանը: Եվ մարդիկ ոչ միայն սոցիալական խնդիրներից, այլև անարդարությունների, պետական կառավարման անարդյունավետության մասին հարցադրումներ ունեն: Ամեն դեպքում իրականացնողը մարդն է, բայց մենք ասում ենք, որ նոր Սահմանադրությունը կիրառման մեխանիզմների առումով անհամեմատ լայն հնարավորություն է ստեղծում, որ կարողանանք այդ խնդիրները լուծել:
– Իսկ եթե Ձեր այդ կանխատեսումը ճիշտ չստացվեց, ու սահմանադրական այս փոփոխություններն ընդամենը ծառայեցին իշխանությունների վերարտադրմանը, Դուք վատ չե՞ք զգա ազգաբնակչության մոտ Ձեր ոչ ճիշտ խոստումների համար:
– Մենք ընդամենը մեխանիզմների մասին ենք խոսում, և դա աբստրակտ բան չէ: Մենք նկարագրում ենք գործող Սահմանադրության մեխանիզմները, որոնք հնարավորություն են տալիս ունենալ նման իրավիճակ, և այս փոփոխությունները, որոնք ավելի լայն հնարավորություն են տալիս՝ վերահսկողական գործառույթներում ընդդիմության դերի ավելացումը, ընդդիմության կայացումը և այլն: Հավատացեք, որ ընդդիմության առկայությունը շատ կարևոր է, և նոր Սահմանադրությունը տալիս է այդ հնարավորությունը:
– Պարոն Այվազյան, Հանրապետական կուսակցության իշխանությունը տարեկան 7 տոկոս տնտեսական աճ էր խոստանում, ինչը այդպես էլ տեղի չունեցավ: Սա չի՞ նշանակում, որ ձեր կառավարումն արդյունավետ չէ:
– Աշխարհից կտրվա՞ծ եք, չե՞ք տեսնում, թե ինչ է կատարվում:
– Միայն արտաքի՞ն խնդիրներն են պատճառը, որ Հայաստանում ձեր խոստացած 7 տոկոս տնտեսական աճը չի ստացվում:
– Կոմպլեքս է:
– Ներքին ի՞նչ խնդիրներ են խոչընդոտում տնտեսության զարգացմանը:
– Բազում խնդիրներ կան: Օրինակ՝ մենաշնորհային, գերիշխող դիրքի խնդիրները, շուկայի առանձնահատկությունները, գնողունակության անկումը, որոշակի ենթակառուցվածքների բացակայությունը, մեր աշխարհագրական դիրքը, տրանսֆերտների նվազումը:
– Մոտ մեկուկես տարի առաջ վարչապետ Հովիկ Աբրահամյանը հայտարարեց, որ գործարար աշխարհում պետք է կիրառել հավասար խաղի կանոններ: Դա հաջողվե՞լ է:
– Իրականացնում ենք այդ հավասար խաղի կանոնները, բայց դա չի նշանակում, որ այսօրվա դրությամբ շուկայում գերիշխող դիրք չկա: Եվ պատահական չէ, որ ես սահմանադրական փոփոխությունների դեպքում առաջարկություն եմ ներկայացրել և շնորհակալ եմ, որ ընդունել են, որ եկեք գերիշխող դիրքը ընդհանրապես բացառենք և ավելի խիստ կանոններ մտցնենք: Դե ֆակտո տնտեսական մրցակցության հավասար պայմանների պարագայում ընդունում ենք գերիշխող դիրքի առկայությունը, բայց ասում ենք, որ թույլ չենք տա չարաշահումներ անել և այդ դիրքից օգտվել: Բայց դուք ուզում եք, որ ես այս կարճ ժամանակահատվածում պատասխանե՞մ ամբողջ տնտեսության առաջ ծառացած խնդիրներին: Չի ստացվի:
– Այդքան շա՞տ են:
– Ես կիսատ կլինեմ:
Լուսանկարները՝ Armenpress-ի