Մոսկվան բաց է Սիրիայում և Իրաքում ահաբեկչության դեմ պայքարում ջանքերի համախմբման համար, ընդհանուր նպատակին ձգտումը պետք է դաշնակիցներ դարձնի Ռուսաստանին, ԵՄ-ին և ԱՄՆ-ին: Այս մասին «Կոմերսանտ» թերթին տված հարցազրույցում ասել է նոր մարտահրավերների և սպառնալիքների հարցերով ՌԴ ԱԳՆ դեպարտամենտի ղեկավար Իլյա Ռոգաչյովը:
«Մենք հետևողականորեն, երկար տարիներ համառորեն գործընկերներին կոչ ենք անում միավորել ջանքերը մեզ բոլորիս համար ընդհանուր ահաբեկչության սպառնալիքի դեմ պայքարում, համագործակցել բարեխղճորեն, իրապես կոլեկտիվ հիմունքով՝ առանց այդ խնդրի քաղաքականացման և գաղափարայնացման, առանց «երկակի չափանիշերի»: Ներկայիս մթնոլորտում, ըստ մեզ, այսպիսի համագործակցությունը դառնում է հրամայական»,- ասել է Ռոգաչյովը:
«… Մեր կողմից, համենայնդեպս, դուռը բաց է մնում: Նախագահը մեզ կոչ արեց «առաջ նայել», այսինքն՝ համագործակցություն ձևավորել, և մենք, անկասկած, այդպես էլ կգործենք հետագայում՝ չնայած մենք լուրջ տարաձայնություններ ունենք ԱՄՆ-ի և ԵՄ անդամների մեծ մասի հետ ներկայիս ահաբեկչական «բռնկման» ծագման վերաբերյալ հայացքներում: Ընդհանուր նպատակին անկեղծ ձգտումը պետք է մեզ դաշնակիցներ դարձնի»,- նշել է Ռոգաչյովը: