Google ընկերությունը ներկայացրել է One Today բջջային հավելվածը, որը նախատեսված է բարեգործական նպատակներով նվիրատվությունների համար: Այս մասին հայտնում է The Verge-ը:
One Today-ն առաջարկում է գումար հատկացնել այս կամ այն նպատակի համար, օրինակ՝ Լաոսի դպրոցականների կրթաթոշակների կամ ռնգեղջյուրների թվաքանակի պահպանման ծրագրի համար: Արշավները փոխվում են ամեն օր: Հավելվածը ժամանակի ընթացքում հարմարվում է օգտատիրոջը և սկսում ցույց տալ միայն նրան հետաքրքրող արշավները:
One Today-ում նվիրատվության չափը ֆիքսված է և կազմում է մեկ դոլար: Ավելի շատ կամ քիչ գումար նվիրաբերել հնարավոր չէ: Վճարումներն իրականացվում են Google Wallet համակարգի միջոցով:
Ոչ կոմերցիոն կազմակերպությունները, որոնք գումար են հավաքում բարեգործական նպատակներով, կարող են մասնակցել նախագծին՝ գրանցվելով One Today-ի կայքում:
Հավելվածը դեռևս հասանելի է միայն ԱՄՆ-ում և միայն Android սարքերի համար: Ծրագրին միանալու համար պետք է մուտքագրել հրավերքի կոդը, որը կարելի է ստանալ Google-ի կայքում:
Ընկերությունը դեռևս չի հստակեցնում՝ ծրագիրը հասանելի կլինի՞ այլ երկրներում, թե՞ ոչ:
