Վարչապետ Հովիկ Աբրահամյանը կառավարության այսօրվա նիստում նախարարներին հորդորել է կառավարության նիստերից հետո չխուսափել լրագրողներից, չհեռանալ այլևայլ մուտքերով, այլ դուրս գալ կառավարության գլխավոր մուտքից, որտեղ լրագրողները նիստերից հետո սպասում են նախարարներին: Վարչապետը հայտարարել է, որ պետք է բաց աշխատել, և կառավարությունը հասարակությունից թաքցնելու բան չունի:
Հովիկ Աբրահամյանի այս հորդորը, իհարկե, միանգամայն ողջունելի քայլ է, ինչպես կառավարության հաշվետվողականությանն ուղղված ցանկացած քայլ: Եվ իհարկե կարևոր չէ, որ տվյալ դեպքում վարչապետի մոտիվացիան ամենևին էլ հաշվետվողականության բարձրացումը չէ: Հովիկ Աբրահամյանի հորդորն իհարկե պայմանավորված է այն ծանր բեռով, որ նրա ուսերին էլ ավելի է ծանրանում և՛ ներքաղաքական ու ներիշխանական, և՛ տնտեսական իմաստով: Ներկայիս վիճակի ծանրությունը ընկնում է Հովիկ Աբրահամյանի վրա, և նրա հորդորն ըստ էության այդ ծանրությունը նախարարների վրա բաժանելու նպատակ ունի: Այսինքն՝ կոչ անելով չփախչել լրագրողներից՝ վարչապետն ըստ էության ենթատեքստում կոչ է անում նախարարներին՝ չփախչել պատասխանատվությունից ընդհանրապես և չկարծել, որ կառավարության աշխատանքի պատասխանատվությունը մնալու է միայն իր ուսերին:
Իսկ որ Հովիկ Աբրահամյանն այս հարցում նախարարներին չի վստահում, ակնհայտ է դարձել բազմաթիվ միջադեպերից, երբ Աբրահամյանը այս կամ այն արտահայտությամբ ակնարկել է, որ կառավարությունում առնվազն կան նախարարներ, որոնք ուրախանում են կառավարության անհաջողություններից, դա բնականաբար դիտարկելով Հովիկ Աբրահամյանի անհաջողությունը:
Աբրահամյանը ըստ էության հիշեցնում է, որ բոլորը նույն նավում են, և չի պատրաստվում միայնակ կրել անհաջողությունը: Միաժամանակ, նախարարներին հորդորելով բաց լինել մամուլի առաջ՝ Հովիկ Աբրահամյանը անկասկած փորձում է նրանց գործունեությունը բերել առավել վերահսկելի, առավել բաց դաշտ՝ նվազեցնելով այդպիսով իր թիկունքում նրանց գործողությունների հավանականությունը:
Աբրահամյանի համար այդ խնդիրը հատկապես հրատապ է ներկա պահին, երբ գլխավորում է սահմանադրական փոփոխությունների հանրաքվեի ՀՀԿ շտաբը: Սա, ըստ էության, իշխանական վերադասավորումների շտաբ է, ինչը նշանակում է, որ այնտեղ ընթանալու է բավական սուր ինտրիգային պայքար: Հովիկ Աբրահամյանն ունի շտաբի վեց տեղակալ, որոնք ներկայացնում են ներիշխանական տարբեր խմբեր: Այսինքն՝ Աբրահամյանն ըստ էության ստացել է երկու լուրջ թիկունքային ճակատ, և բնական է, որ ներկայումս գոնե կառավարության թիկունքը նա փորձում է հնարավորինս ավելի շատ լուսավորել՝ նախարարներին դարձնելով լրագրողների համար առավել հասանելի՝ այդ մի թիկունքում մութ գործերից ապահովագրվելու համար:
Լուսանկարը՝ Photolure-ի
