«Արևելա-եվրոպական ֆինանսական կորպորացիա» բանկի նախկին ղեկավար Ալեքսանդր Գիտելսոնը Ավստրիայում՝ իր սեփական տանը ձերբակալվել է: Նրա նկատմամբ հայտարարվել էր միջազգային հետախուզում՝ բյուջետային միջոցների հետ կապված խարդախության և շուրջ 3 մլն ռուբլի յուրացնելու համար: Այս մասին հայտնում է Kommersant-ը:
Բանկիր Գիտելսոնը թաքնվում էր 2010 թվականի աշնանից: Նա ձերբակալվել է Մոստֆիրտել շրջանի քրեական ոստիկանության աշխատակիցների կողմից: Այնտեղ նա կիպրական կեղծ ընկերության միջոցով տուն էր ձեռք բերել անտառի ծայրին, որտեղ բնակվել է կնոջ հետ:
Կապված այն բանի հետ, որ բանկիրը գտնվում էր Ինտերպոլի կողմից հետախուզման մեջ և հեռակա կարգով ձերբակալվել է ռուսական դատարանի կողմից, Վիեննայի դատարանը էքստրադիցիայի հարցի քննման ընթացքում նրան կալանքի տակ կպահի:
Պարբերականը նշում է, որ Ավստրիան բավականին ակտիվորեն է արտահանձնում մեղադրյալներին Ռուսաստան, այդ իսկ պատճառով ենթադրվում է, որ խնդիրներ չեն առաջանա:
Բանկի նախկին սեփականատերը որպես մեղադրյալ անցնում է խարդախության և յուրացումների գործերով: Քանի դեռ նա հետախուզման մեջ էր, Մոսկվայի Մեշանսկի շրջանային դատարանը նրան դատապարտել էր 5 տարվա ազատազրկման Պետդումայի պատգամավոր Ադնան Մուզիկաևից 500 մլն ռուբլի գողանալու համար: