Ամերիկյան հետախուզական ծառայությունների ստացած տվյալները հաստատում են Փարիզում ահաբեկչությունների կազմակերպմանը Բելգիայում ապրող մարոկկացի Աբդելհամիդ Աբաաուդի մասնակցությունը: Այս մասին երեքշաբթի CNN հեռուստաալիքի եթերում հայտնել է ԱՄՆ փոխնախագահի ազգային անվտանգության հարցերով օգանական Քոլին Քալը:
«Մենք նրան արդեն որոշ ժամանակ հետևել ենք,- ասել է նա:- Թեև մենք տեղեկություններ չունեինք այդ ահաբեկչությունների պատրաստման մասին, զարմանալի չէ, որ տվյալները մատնանշում են նրա մասնակցությունը»: «Ներկայումս մեր ունեցած տեղեկությունը խոսում է այն վարկածի օգտին, որ նա դրան ամենաանմիջական մասնակցություն է ունեցել»,- հավելել է Քալը: Նա նշել է, որ ԱՄՆ-ը ուշադիր հետևում է հետաքննության ընթացքին:
Քալը նաև հայտնել է, որ Վաշինգտոնի տվյալներով՝ Աբաաուդը ներկայումս Սիրիայում է: Հարցին՝ արդյոք ճի՞շտ են պնդումները, որ հակաահաբեկչական կոալիցիայի ուժերը փորձել են ոչնչացնել այդ մարդուն, Կալը պատասխանել է. «Նա նրանց թվում է, ում մենք կուզենայինք հասնել, բայց գաղտնի գործողությունների մասին ես չեմ խոսի»:
Ավելի վաղ ԶԼՄ-ները հայտնում էին, որ, հետաքննության տվյալներով, 28-ամյա Աբաաուդը եղել է Ֆրանսիայում ահաբեկչությունների կազմակերպիչը:
ԶԼՄ-ների նյութերում ասվում էր, որ Աբաաուդը կապվել է անցած շաբաթ Փարիզում ահաբեկչությունները իրագործած ահաբեկիչների հետ:
CNN-ը նաև հայտնել է, որ ԴԱԻՇ-ի դեմ պայքարի կոալիցիայում ԱՄՆ դաշնակիցները մտադիր են եղել ոչնչացնել Աբաաուդին, բայց մի քանի շաբաթ առաջ կորցրել են նրա հետքը Սիրիայում:
