Իսրայելի կառավարության ղեկավար Բենիամին Նեթանյահուն համաշխարհային հանրությանը կոչ է արել զգուշություն ցուցաբերել Սիրիայի ընդդիմությանը զենքով մատակարարելու որոշում ընդունելիս, որտեղ նրա խոսքերով՝ «չարը կռվում է չարի դեմ»:
Ինչպես հաղորդում է BBC-ն, Նեթանյահուն նախօրեին Սիրիայում տիրող իրավիճակը քննարկել է Մեծ Բրիտանիայի վարչապետ Դևիդ Քեմերոնի հետ: Նշենք, որ Լոնդոնում Իսրայելի վարչապետը մասնակցել է Մարգարետ Թետչերի հուղարկավորությանը:
Նեթանյահուի խոսքով՝ սիրիացի գրոհայիններին զինելը պահանջում է պատասխանել «Ո՞ր գրոհայիններին և ի՞նչ զենքով» հարցին:
«Սա շատ բարդ հարց է յուրաքանչյուր երկրի համար»,- ասել է նա:
Վարչապետը հրաժարվել է պատասխանել այն հարցին, թե արդյոք ինքը Քեմերոնին կոչ արե՞լ է պահպանել զենքի էմբարգոն, որի գործողության ժամկետը լրանում է մայիսի վերջին:
«Այն ամենը, ինչ ես նրան ասել եմ, ասվել է մասնավոր զրույցի ձևաչափով»,- ասել է նա և հավելել, որ իրենք հասկանում են՝ անհրաժեշտ է դադարեցնել ահաբեկչությունը և արյունահեղությունը Սիրիայում, սակայն այնտեղ բարդ իրավիճակ է, չարը կռվում է չարի դեմ:
Նեթանյահուն նշել է, որ իրեն ավելի շատ հուզում է սիրիական զինանոցների ճակատագիրը և այն, որ դրանք կարող են հայտնվել ծայրահեղականների ձեռքերում, որոնք կռվում են ինչպես Ալ-Ասադի դեմ, այնպես էլ նրա կողմից:
«Այնտեղ կա «Ալ-Քաիդա», «Հըզբոլլահ»… այլ ջիհադական տարրեր: Հավատում եք, թե ոչ, սակայն դրանք ամենավտանգավոր իսլամիստական ծայրահեղականներն են աշխարհում: Իհարկե, մենք անհանգստացած ենք, որ զենքը, որը կարող է փոխել ուժերի հավասարակշռությունը Մերձավոր Արևելքում, կարող է հայտնվել այդ ահաբեկիչների ձեռքերում, և մենք մեզ իրավունք ենք վերապահում թույլ չտալու, որպեսզի նման բան կատարվի»,- հավելել է Իսրայելի վարչապետը: