Սահմանադրական հանրաքվեին մնացել է 20 օր։ Վերջին օրերին բազմաթիվ տեղեկություններ են ստացվում այն մասին, որ իշխանությունը գործի է դրել վարչական ողջ մեքենան։ Մասնավորապես, ըստ տեղեկությունների, բուժհաստատությունների, կրթօջախների, մանկապարտեզների տնօրենները քաղաքացիների հետ բացատրական աշխատանքներ են տանում։
ԱԺ ՀԱԿ խմբակցության ղեկավար Լևոն Զուրաբյանն այսօր խորհրդարանի ամբիոնից հայտարարեց, որ Կրթության և գիտության նախարար Արմեն Աշոտյանը, տնօրեններին հրահանգում է ուսուցիչներին հրաման տալ՝ հավաքել աշակերտների ծնողներին, ժողովներ անել և պարտադրել ԱՅՈ քվեարկել։
Հնչող մեղադրանքներին ի պատասխան, նախարար Արմեն Աշոտյանը Ազգային ժողովում կայացած ճեպազրույցում պատասխանելով լրագրողների հարցերին ասաց, որ անգամ մեծ ցանկության դեպքում ինքը չունի վարչական լիազորություն՝ հանձնարարություն տալու հանրապետության բոլոր դպրոցներին:
Երևանի Նելսոն Ստեփանյանի անվան թիվ 71 հիմնական դպրոցի տնօրեն Գայանե Դեմիրյանը մինչդեռ կարծում է, որ կհեղինակազրկվի այն դպրոցի տնօրենը, որը նման քարոզչություն կանի դպրոցում։ Տնօրենի համար անհասկանալի է, թե ինչու է ամեն ընտրություններից առաջ նման խոսակցություններ լինում:
Մայրաքաղաքի Խաչիկ Դաշտենցի անվան թիվ 114 ավագ դպրոցի տնօրեն Ռուզաննա Կոստանյանն էլ իր հերթին վստահեցրեց՝ նախարարությունից իրեն չեն պարտադրել ԱՅՈ-ի քարոզչություն անել և ԱՅՈ-ի ձայներ հավաքել։ Դպրոցի տնօրենը հերյուրանք որակեց նման խոսակցությունները։