Ադրբեջանական Turan լրատվական գործակալության փոխանցմամբ՝ երեկ միանգամից մի քանի կայքեր հայտնել են Ազգային անվտանգության նախարարության (ԱԱՆ) գեներալ Ակիֆ Չովդարովի կալանավորման մասին, ով պաշտոնանկ էր արվել երկու օր առաջ։
Ոչ պաշտոնական տվյալներով՝ դատարանը նրան կալանքի տակ է վերցրել 3 ամսով։ Պաշտոնապես չի հաջողվել այդ մասին մեկնաբանություն ստանալ գլխավոր դատախազության մամլո ծառայությունից։ Հայտնի չէ նաև, թե ինչ մեղադրանքներ են ներկայացվել Չովդարովին։
Սակայն շատ գործարարներ ու տարբեր կազմակերպությունների ներկայացուցիչներ հայտարարել են, որ Չովդարովը զբաղվել է դրամաշորթությամբ, բիզնեսներ ու ամբողջական ձեռնարկություններ խլելով։ Չովդարովի անունը շոշափվել է նաև մի շարք սպանությունների ու առևանգումների գործերում։ Վստահեցվել է նաև, որ նա անգամ ունեցել է սեփական գաղտնի բանտ, որտեղ պահել է ձեռնարկատերերին՝ նրանցից գումարներ շորթելով։
Բացի այդ, խուզարկություն է կատարվել ԱԱՆ նախկին նախարար Էլդար Մահմուդովի առանձնատանը, որը գտնվում է Բադամար ավանում։
