Այս տարվա մարտի 5-ին տեղի ունեցած ԲՀԿ արտահերթ համագումարի ժամանակ կուսակցության նախագահ Գագիկ Ծառուկյանը հրաժարվեց կուսակցության նախագահի պաշտոնից, և նրա փոխարեն կուսակցության նախագահ ընտրվեց ԲՀԿ խմբակցության քարտուղար Նաիրա Զոհրաբյանը:
Վերջին շրջանում խոսակցություններ տարածվեցին, որ ԲՀԿ վերնախավը դժգոհ է Զոհրաբյանի գործունեությունից, և հնարավոր է, որ կուսակցության հիմնականում տղամարդկանցից կազմված վերնախավը հեղաշրջում իրականացնի՝ նրան ևս ուղարկելով վաստակած հանգստի: Իր դեմ իրականացվելիք հնարավոր դավադրության մասին մենք զրուցեցինք Նաիրա Զոհրաբյանի հետ:
– Ինչպե՞ս եք վերաբերվում տարածվող այն խոսակցություններին, որ կուսակցության ներսում կա դժգոհություն Ձեր գործունեությունից, և դժգոհողները պատրաստվում են ներկուսակցական իշխանափոխություն իրականացնել: Ըստ խոսակցությունների՝ Ձեզ պատրաստվում են պատվավոր աքսոր ուղարկել՝ որևէ երկրում դեսպանի կարգավիճակում:
– Շատ անլուրջ եմ վերաբերվում, մանավանդ որ՝ ես զբաղված եմ շատ ավելի կարևոր գործերով, քան նման խոսակցություններին հետևելն է, ուստի անիմաստ եմ համարում նման հիմարությունները մեկնաբանելը: Ես հասկանում եմ՝ որտեղ են խմորվում այդ խոսակցությունները, և ուզում եմ ասել, որ այդ խոսակցությունները որևէ կապ չունեն «Բարգավաճ Հայաստան» կուսակցության հետ: ԲՀԿ-ն վաղուց արդեն հաղթահարել է ներկուսակցական տարաձայնությունները, և մենք զբաղված ենք մեր առօրյա ներկուսակցական խնդիրները լուծելով:
– Տեսակետ կա, որ ԲՀԿ վերնախավի տղամարդիկ չեն կարող հանդուրժել, որ կուսակցության ղեկավարը կին է, և նրանք հանուն իրենց վիրավորված արժանապատվությունը պաշտպանելու ուզում են կուսակցության ղեկավարի պաշտոնում տեսնել տղամարդու: Հնարավոր է, որ հեղաշրջումը տեղի ունենա ոչ թե քաղաքական անհամաձայնությունների, այլ գենդերային համերաշխության հողի վրա:
– Դա երկրորդ անհեթեթությունն է, որովհետև ես մեր կուսակցության թե՛ խորհրդարանական խմբակցության, թե՛ քաղաքական խորհրդի տղամարդ անդամների հետ ունեմ հրաշալի մարդկային հարաբերություններ և երբևէ որևէ մեկի մոտ չեմ նկատել բարդույթ, որ կուսակցության ղեկավարը կին է: Մենք բոլորս կուսակցական ընկերներ ենք, և դրանում է ԲՀԿ-ի քաղաքական ամրության և հաջողության բանալին:
– Քննարկվում է ԲՀԿ-ից հեռացած պատգամավորների և համայնքապետերի հնարավոր հետվերադարձի հարցը, այդ խոսակցությունները ավելի առարկայական դարձան Արայիկ Աղաբաբյանի հետվերադարձից հետո: Դուք հնարավոր համարո՞ւմ եք նրանց հետվերադարձը, մանավադ որ՝ իրենք կարծես թե չեն ժխտում նման հնարավորությունը:
– Արդեն ասել եմ, որ Արայիկ Աղաբաբյանի դեպքը յուրահատուկ էր, քանի որ նա կուսակցությունից հեռանալու մասին դիմում գրելուց հետո էլ շարունակում էր կապված մնալ ԲՀԿ խորհրդարանական խմբակցության և Արմավիրի տարածքային կառույցի հետ: Ինչ վերաբերում է մեր մյուս նախկին կուսակցականներին՝ ես նրանց բոլորի հետ, գրեթե առանց բացառության, ունեմ շատ ջերմ հարաբերություններ: Բայց նրանց կուսակցություն վերադառնալ-չվերադառնալու հարցը, եթե նրանք նման ցանկություն դրսևորեն, պետք է քննարկվի առանձին, որովհետև մարդկային հարաբերությունները այլ հարթություն են, քաղաքական հարաբերությունները՝ բոլորովին այլ:
– Մամուլում տեղեկություններ եղան, որ նոյեմբերին ԲՀԿ-ն պատրաստվում է արտահերթ համագումար հրավիրել: Արդեն հստակեցրե՞լ եք, թե երբ է տեղի ունենալու և ինչ օրակարգով:
– Մենք նախատեսել էինք նոյեմբերին կուսակցության արտահերթ համագումար կազմակերպել կանոնադրական փոփոխություններ իրականացնելու և որոշակի կազմակերպչական հարցեր լուծելու համար: Բայց քանի որ փետրվարին լրանում է կուսակցության հերթական համագումար անցկացնելու ժամկետը և միաժամանակ 2016թ. լրանում է կուսակցության հիմնադրման 10-ամյակը, որոշեցինք, որ հրավիրելու ենք շատ մեծ համագումար՝ նշելու ինչպես կուսակցության հիմնադրման 10-ամյակը, այնպես էլ իրականացնելու անհրաժեշտ կանոնադրական և ծրագրային փոփոխությունները:
