«Ղարաբաղ» կոմիտեի նախկին անդամ Սամսոն Ղազարյանը հետ է վերցրել իր վրա հարձակված անձի դեմ ներկայացրած բողոքը։ Ղազարյանն «Առաջին լրատվական»-ի հետ զրույցում ասաց, որ այդ քայլին է գնացել նախ այն պատճառով, որ այդ քաղաքացին երկու անչափահաս երեխա է ունեցել, վարձով է ապրում, և հետո՝ իր ընկերներից մի քանիսը զանգել ու միջնորդել են հետ վերցնել բողոքը, քանի որ ճանաչել են այդ քաղաքացուն։
«Եկավ, մեղա եկավ, ասաց՝ սխալ բան է ստացվել։ Հետո էլ իմացա, որ վարձով է ապրում, խեղճ վիճակում է, երկու անչափահաս երեխա ունի։ Դրանից բացի էլ՝ ընկերներիցս մի քանիսը զանգեցին, ասացի՝ լավ»,- մեզ հետ զրույցում ասաց Ղազարյանը՝ հավելելով, որ բացի այդ ամենից՝ առերեսման ժամանակ ինքը վերջնականապես համոզվել է, որ այդ քաղաքացին ոչ մեկի կողմից ուղարկված չի եղել, պարզապես կենցաղային հողի վրա վեճ է եղել, դրա համար էլ չի գնացել մինչև վերջ և բողոքը հետ է վերցրել։
Հիշեցնենք, որ հոկտեմբերի 21-ին Սամսոն Ղազարյանը հարձակման էր ենթարկվել Արաբկիր համայնքում: Մամիկոնյանց փողոցում սև գույնի «Գազ 24» մակնիշի 062 ԼԼ 10 համարանիշով մեքենայից Բակուր Փայտյան անունով քաղաքացին մոտեցել էր Ղազարյանի վարած տաքսի ավտոմեքենային, քաշքշել, հարվածել ու հեռացել: Կարճ ժամանակ անց ոստիկանությունը հայտնաբերել էր այդ քաղաքացուն և բերման ենթարկել։
