Շուրջ մեկ տարի և չորս ամիս համառ աշխատանքներից հետո պատրաստ է ռեժիսոր Արա Շիրինյանի «Հայաստանի կորսված գարունը» ֆիլմը, որը բաղկացած է երկու մասից: Առաջին մասում ամփոփված են 2007-ի սեպտեմբերից մինչև 2008-ի Մարտի 1-ը նախընտրական, ինչպես նաև ընտրական և հետընտրական փուլերը, երկրորդում`բուն Մարտի 1-ի իրադարձությունները: Տիգրան Պասկևիչյանը նշեց, որ մարտի մեկի բացահայտումը մեր հանրապետության կարևորագույն, առաջնահերթ, ամենահրատապ խնդիրներից է. «Ես չեմ պատկերացնում որևէ այլ խնդիր, որը դասակարգելու դեպքում վեր կդրվի Մարտի 1-ից»:
Ֆիլմում Տիգրան Պասկևիչյանի խոսքերով, ցույց են տրվել և՛ Մարտի 1-ի պատճառները, և՛ հետևանքները: Նրա խոսքերով` մեր բոլոր դժբախտությունները կապված են հասարակ մարդու, հասարակ քաղաքացու կամարտահայտության իրավունքը սահմանափակելու կամ ոչնչացնելու հետ և բոլոր խնդիրները կարող են լուծվել միայն այն դեպքում, երբ սովորական քաղաքացին կարողանա իր կամքը արտահայտել ընտրությունների, հանրահավաքների, մամուլի, խոսքի ազատության միջոցով:
124 րոպե տևողությամբ ֆիլմը կունենա նաև անգլերեն, ռուսերեն, ֆրանսերեն տարբերակներ: Այսօրվանից այն ուղարկվել է բոլոր բարձրաստիճան պաշտոնյաներին, ՀՀ երկրորդ նախագահ Ռոբերտ Քոչարյանին և ՀՀ ԱԳ նախկին նախարար Վարդան Օսկայանին: