Տնտեսագիտության լոնդոնյան դպրոցի (LSE) ղեկավարությունը հայտարարել է, որ BBC ընկերությունը համալսարանի ուսանողներին վտանգի է ենթարկել՝ նրանց հետ գաղտնի Հյուսիսային Կորեա նկարահանող խումբ ուղարկելով: Այս մասին հայտնում է The Daily Telegraph-ը:
Անցած հանգստյան օրերին LSE-ի ղեկավարությունը նամակ է ուղարկել համալսարանի բոլոր աշխատակիցներին ու ուսանողներին՝ պատմելով, թե ինչպես են հեռուստաալիքի լրագրողները ուսանողների տեսքով քողարկված Հյուսիսային Կորեա ուղևորվել՝ փաստագրական ֆիլմի նկարահանումների համար: LSE-ում հայտնել են, որ նրանք միտումնավոր չեն նախազգուշացրել իրենց այցի նպատակի մասին:
Համալսարանի ղեկավարությունը հայտարարել է, որ լրագրողները իրենց այցի նպատակի մասին բավարար տեղեկություն չտրամադրելով կարող էին վտանգավոր դրության մեջ դնել ուսանողներին, եթե երկրի իշխանություններն իմանային ֆիլմի նկարահանումների մասին: Համալսարանի ներկայացուցիչները նշել են, որ BBC-ի գործողությունները վնաս են հասցրել համալսարանի հեղինակությանը:
Համալսարանի ղեկավարությունը պահանջել է ներողություն խնդրել ուսանողների առջև և դադարեցնել «Հյուսիսային Կորեան քողի ներքո» ֆիլմի հեռարձակումը: BBC One հեռուստաալիքը ծրագրում է ֆիլմը ցուցադրել ապրիլի 15-ի երեկոյան՝ Panorama ծրագրի շրջանակում: Սակայն BBC-ից հայտնել են, որ ուսանողներն իմացել են, որ իրենց լրագրողներ են ուղեկցում, և հրաժարվել են դադարեցնել ցուցադրությունը:
Այցը Հյուսիսային Կորեա կայացել է մարտի վերջին և կազմակերպվել Grimshaw Club ուսանողական ակումբի կողմից, որը մտնում է համալսարանի միջազգային հարաբերությունների բաժնի մեջ: