Երեկ պաշտոնական այցով Վրաստանում էր Ադրբեջանի նախագահ Իլհամ Ալիևը։
Ի տարբերություն օրեր առաջ Վրաստան կատարած Հայաստանի Հանրապետության նախագահի այցի, որն ավարտվեց ընդամենը Սուրբ Գևորգ եկեղեցու վերաօծման արարողությանը մասնակցելով, Վրաստանի և Ադրբեջանի նախագահները ստորագրեցին փաստաթուղթ, որն ուղղված է երկու երկրների հարաբերությունները զարգացնելուն, այդ թվում՝ անվտանգության, տնտեսության, քաղաքականության, առևտրի, մշակույթի և կրթության ոլորտներում։
Վրաստանի և Ադրբեջանի նախագահների քննարկումների առանցքում են եղել տարածքային ամբողջականության հետ կապված խնդիրները:
Համատեղ ասուլիսում Վրաստանի նախագահ Գիորգի Մարգվելաշվիլին մասնավորապես ասել է, որ չնայած տարածքային ամբողջականության հետ առաջացած խնդիրներին, Վրաստանը հավատարիմ կմնա իր տրանզիտային պարտավորություններին:
Վրաստանի հայ հասարակական և քաղաքական գործիչները լավատես են, չնայած Վրաստանը սերտացնում է իր հարաբերությունները Ադրբեջանի հետ, դա ի վնաս Հայաստանի հետ ունեցած հարաբերությունների չի լինի։
Թբիլիսիի խորհրդարանի հայ պատգամավոր Սամվել Պետրոսյանը մեզ հետ հեռախոսազրույցում ընդգծեց. Վրաստանի համար և՛ Հայաստանը, և՛ Ադրբեջանը կարևոր հարևան երկրներ են, բայց ի տարբերություն Հայաստանի՝ Ադրբեջանի հետ Վրաստանը տնտեսապես ավելի խորն է կապված:
«Բազմազգ Վրաստան» քաղաքացիական նախաձեռնության ղեկավար Առնոլդ Ստեփանյանը մեզ հետ հեռախոսազրույցում ընդգծեց, որ նույնիսկ Ադրբեջանի նախագահի հետ հանդիպումը էական ազդեցություն չի ունենա հայ-վրացական հարաբերությունների վրա. «Որպես կանոն՝ Ադրբեջանի և Վրաստանի նախագահների հանդիպումների ժամանակ կոնկրետ տնտեսական հարցեր են քննարկվում, և փաստաթուղթ է ստորագրվում։ Ադրբեջանն իրոք կարևոր երկիր է Վրաստանի համար, մանավանդ Բաքու-Թբիլիսի-Կարս երկաթուղու կառուցումից հետո Վրաստանն էլ ավելի կկարևորվի Ադրբեջանի համար։
Ինչ վերաբերում է Հայաստանի նախագահի այցին, այդ այցը, ըստ Ստեփանյանի, ևս կարևոր էր. «Ադրբեջանը տնտեսական տեսանկյունից ավելի հետաքրքիր երկիր է Վրաստանի համար, իսկ Հայաստանը կարող է միջանցիկ երկիր դառնալ՝ Իրան-Հայաստան-Վրաստան-Սև ծով-Եվրոպա»։
Ստեփանյանը միևնույն ժամանակ ընդգծում է, որ Հայաստանն ունի հնարավորություն դառնալ Վրաստանի համար ավելի կարևոր երկիր, քան հիմա կա, և դա մեծ մասամբ կախված է նրանից, թե ինչպես է Հայաստանի դեսպանատունը Վրաստանում աշխատում։
Քաղաքագետ Գևորգ Մելիքյանն իր հերթին ընդգծում է՝ դեսպանության աշխատանքն էական ու կարևոր նշանակություն ունի:
Գևորգ Մելիքյանի խոսքով՝ Հայաստան-Վրաստան և Վրաստան-Ադրբեջան հարաբերությունները չի կարելի միևնույն հարթության մեջ դիտարկել։
Վրաստանը, նրա խոսքով, այժմ Ադրբեջանի սիրելի երկիրն է, և ստացվել է այնպես, որ Հայաստանը կամաց-կամաց հետ է մղվել այդ եռանկյունուց, Ադրբեջանն իր գումարներով և ազդեցությամբ հետ է քաշել դեպի իրեն: