Բրիտանական The Guardian թերթի փոխանցմամբ՝ Իրանն աֆղան փախստականներին ուղարկում է Սիրիա նախագահ Բաշար Ասադի համար մարտնչելու և զոհվելու համար։ Իրանը Սիրիա մեկնող աֆղան փախստականներին խոստանում է ամսական աշխատավարձ և կացարան՝ փոխարենը պահանջելով, որ նրանք դրա դիմաց հանդես գան Ասադի կողմից՝ Դամասկոսի շիական սրբավայրերը փրկելու համար։
Իրանում ու Սիրիայում գտնվող աֆղան փախստականներից ձևավորվել է Fatemioun ռազմական ստորաբաժանումը։ Այն իր թվակազմով երկրորդ օտար ռազմական կոնտինգենտն է Սիրիայում, որը հանդես է գալիս Սիրիայի նախագահ Բաշար Ասադի կողմից։ Fatemioun-ն այդ հարցում զիջում է միայն լիբանանյան «Հզբոլլահ» շարժմանը։
Իրանը մշտապես պնդել է, որ Սիրիայում ունի միայն խորհրդականներ ու ավագ հրամկազմի ներկայացուցիչներ, որոնք Ասադի զորքերին օգնում են ռազմական գործողություններ պլանավորելու ու վերահսկելու հարցում։ Սակայն աֆղաններին Սիրիա ուղարկելը վկայում է, որ նա օգտագործում է նաև այլ մեթոդներ։ Աֆղան փախստականներին ամեն օր հավաքագրում են մեշհեդում ու Ղոմում։ Իրանական այս երկու քաղաքներում է գտնվում աֆղան փախստականների ամենամեծ թիվը։
