Առաջ է քաշվել Տուլայում Մոսկվայից Երևան ուղևորվող ավտոբուսի վթարի հինգ վարկած: Այս մասին հայտարարեց ՀՀ տրանսպորտի և կապի նախարար Գագիկ Բեգլարյանը, ով տուժածներին և զոհերի աճյունները տեղափոխող օդանավով Տուլայից ժամանեց Հայաստան: «Ընթանում է քննություն, որից հետո կպարզվի իրական պատճառը: Առաջ է քաշվել վթարի հինգ վարկած, և այս պահին չպետք է շտապե լ եզրակացություն անել: Կոչ եմ անում սպասել քննության արդյունքներին: Վթարված ավտոբուսի վարորդին երեք օրով կալանավորել են, որպեսզի ավարտեն քննությունը, որից հետո պարզ կլինի, թե ինչ մեղադրանք կառաջադրվի վարորդին»,-ասաց նախարարը: Հարցին` գործն արդյոք փոխանցվելու է հայկական կողմին, Բեգլարյանը պատասխանեց, որ Հայաստանում ևս քրգործ է հարուցվել, և աշխատանքները կկատարվեն համատեղության սկզբունքով:
Վթարված ավտոբուսը շահագործող կազմակերպության գործունեության կասեցման մասին հարցին ի պատասխան` նախարարը պատասխանեց, որ ոչ կանոնավոր ուղևորափոխադրումների հետ կապված Տրանսպորտի և կապի նախարարությունը վերահսկողական մեխանիզմներ չունի: Նախարարությունն առաջիկայում կառավարությանը կներկացանի օրենքի նախագիծ, որով կարգավորելու են տրանսպորտի ոլորտում առկա խնդիրները: Նախագծի մանրամասները պարզ կդառնան կառավարության առաջիկա նիստից հետո: «Մենք մտահոգությունն ունեցել ենք բավական վաղուց, և օրենքը մեկ կամ երկու օրում չի գրվում: Տրանսպորտի մասին օրենքն ընդունվել է տարիներ առաջ և որպեսզի ավելի լիբերալ լիներ, տրվել են երկու տեսակի որակավորումներ` կանոնավոր և ոչ կանոնավոր: Ոչ կանոնավոր ուղևորափոխադրման նկատմամբ պետական վերահսկողություն գրեթե չկա: Միշտ որոշել ենք չգնալ խստացումների, բայց նման դեպքերը ցույց են տալիս, որ հարկավոր է գնալ այդ ճանապարհով: Պետք է խստացումների գնալ այն ոլորտներում, որտեղ հնարավոր են մարդկային զոհեր»,-ասաց Գագիկ Բեգլարյանը:
