Վրացական Apsny.ge կայքի փոխանցմամբ, Վրաստանը կոնկրետ առաջարկներ է պատրաստել զբոսաշրջության ոլորտում Ադրբեջանի հետ համագործակցության ընդլայնման համար: Այս խնդիրը քննարկվել է Վրաստանի էկոնոմիկայի և կայուն զարգացման նախարար Վերա Կոբալիայի մեկօրյա ադրբեջանական այցի ժամանակ:
Վերջինս ասել է. «Տվյալ պահին մենք զբոսաշրջությանն առնչվող կոնկրետ առաջարկներ ենք պատրաստել, և կարծում եմ, որ դրանք կհետաքրքրեն ադրբեջանցի գործարարներին, քանի որ մեծ թվով ադրբեջանցիներ իրենց հանգիստն անցկացնելու համար նախընտրում են Վրաստանը:
Մեր վիճակագրական տվյալներով` 2010 թվականին Ադրբեջանից Վրաստան է այցելել մոտ կես միլիոն զբոսաշրջիկ: Ձմռանը նույնպես նկատվել է 40 տոկոսանոց աճ:
Սև ծովի ափամերձ հատվածում մենք ունենք երկու զբոսաշրջային գոտի, ուր և մենք ադրբեջանցի գործարարներին առաջարկում ենք անվճար հիմունքներով հողակտորներ հատկացնել` իրենց ներդրումները կատարելու համար: Նրանք 15 տարով կազատվեն բոլոր հարկերից: Վրաստանը նաև իր վրա կվերցնի դրանց հաղորդակցային-ենթակառուցվածքային աշխատանքները:
Ադրբեջանցի գործարարները հնարավորություն ունեն ընտրություն կատարելու տարբեր ճարտարապետական նախագծերի միջև, որոնք ստեղծվել են եվրոպացի դիզայներների կողմից, կամ էլ նրանք կարող են Վրաստան ժամանել սեփական նախագծերով:
Ես Ադրբեջանի մշակույթի և զբոսաշրջության նախարարին առաջարկեցի օտարազգի զբոսաշրջիկներին ներկայացնել «Ադրբեջան-Վրաստան» ընդհանուր զբոսաշրջային փաթեթը: Այսինքն՝ օտարազգի զբոսաշրջիկները 5-7 օրվա այցի փոխարեն, կվճարեն 2 շաբաթվա համար և մեկ փաթեթի շրջանակներում հնարավորություն կստանան հանգստանալու թե´ Ադրբեջանում, թե´ Վրաստանում:
Ներկայիս դրությամբ բավականին աճել է զբոսաշրջիկների հետաքրքրությունը Վրաստանի նկատմամբ, ինչի պատճառով էլ Վրաստանում արդեն նկատվում է հյուրանոցային համարների սակավություն»:
Հիշեցնենք, որ ավելի վաղ վրացական կողմը հայտարարել էր, որ իրենց ակնկալիքներով, այս տարի Հայաստանից Վրաստան այցելող զբոսաշրջիկների թիվը կեռապատկվի:
