Երեկ ամբողջ օրվա ընթացքում Սիրիայի տարբեր քաղաքներում շարունակվել են բախումները ցուցարարների և զինված ուժերի միջև: «Առաջին լրատվականը» տեղեկացրել էր, որ ծանր զինտեխնիկա է մտցվել մի քանի քաղաք: Դեպքերը առավել արյունալի են զարգացել հարավային Դարա’ա քաղաքում: Associated Press գորածակալությունը հաղորդում է առնվազն 11 զոհի մասին: Al-Jazeera-ն տեղեկացնում է 25 զոհի մասին: Զոհերի մեծ թիվը պայմանավորված է անկանոն կրակահերթերով, որ բացում են զինվորականները ցույցի մասնակիցներ վրա:
France Presse գործակալությունը տեղեկացնում է, որ անհնար է դիակները հավաքել փողոցներից, քանի որ անմիջապես կրակ է բացվում նրանց մոտեցողների ուղղությամբ: Միայն 7 զոհվածների հարազատներին է հաջողվել վերցնել իրենց մերձավորի դիակը: Գործակալությունը հաղորդում է, որ այդ քաղաքում այս պահին կա 3-5 հազար զինվորական: Սիրիայի իշխանությունները հաղորդել են, որ զորք են մտցրել այդ քաղաք` անսալով տեղի բնակչության` իրենց անվտանգությունը ապահովելու խնդրանքներին: Իշխանությունները հայտարարում են մի քանի «գրոհայինի» ձերբակալության և ոչնչացման մասին: Ըստ իրավապահների` առգրավվել է մեծ քանակությամբ զենք և զինամթերք:
Իրավապաշտպան Aswasiah կազմակերպությունը հաղորդում է, որ մեկ օրվա ընթացքում Սիրիայում ձերբակալվել է 500 մարդ: Այս մասին հայտնում է Reuters գործակալությունը` հավելելով, որ անցած օրը Դարա’ա քաղաքում առնվազն 20 մարդ է զոհվել:
ԱՄՆ պետքարտուղարությունը որոշում է կայացրել Դամասկոսից դուրս բերել ամերիկյան դեսպանության անձնակազմի մի մասին: Պետդեպարտամենտը նաև խորհուրդ է տվել իր քաղաքացիներին հնարավորինս կարճ ժամկետում լքել Սիրիայի տարածքը, քանի որ քաղաքական անկայունությունը վտանգ է ներկայացնում նրանց համար: Այս մասին հաղորդում է Associated Press գործակալությունը: Տարհանման ենթակա են դիվանագետների ընտանիքները և տեխնիկական անձնակազմը:
Հիշեցնենք, որ հենց Դարա’ա քաղաքից են սկսվել բողոքի ակցիաները` քաղաքական բարեփոխումների և գործող իշխանության հրաժարականի պահանջով, որոնք հետագայում տարածվել են Սիրիայի մյուս քաղաքներում:
