Կանադացի երգիչ Ջասթին Բիբերը հոկտեմբերի 29-ին Օսլոյում համերգն ընդհատել է՝ կատարելով ընդամենը մեկ երգ: The Guardian-ի հաղորդմամբ՝ երաժիշտը զայրացել ու լքել է բեմը, երբ երկրպագուները փորձել են բռնել նրա ձեռքերից ու ոտքերից:
Պարբերականը նշում է, որ ելույթի ժամանակ Բիբերը մի քիչ ջուր է թափել բեմի ծայրին և որոշել է ինքնուրույն մաքրել այն: Երբ նա հատակին է գցել շորն ու սկսել սրբել ջուրը, երկրպագուները սկսել են առանց կանգ առնելու ձեռքերը դեպի նա ձգել: Երգիչը փորձել է ինչ-որ բան ասել երկրպագուներին, իսկ հետո շրջվել ու գնացել է կուլիսներ՝ հայտարարելով, որ շոուն ավարտված է:
Համերգի ներկաները սկզբում Բիբերի արարքը կատակ են համարել և երկար ժամանակ նրան խնդրել են բեմ վերադառնալ: Երբ հայտնի է դարձել, որ նա բեմ չի բարձրանա, շատ երկրպագուհիներ լաց են եղել: Համերգի կազմակերպիչն առայժմ չի նշում՝ արդյոք շոուն կտեղափոխվի՞ ուրիշ օր:
Մի քանի ժամ անց Բիբերն իր ինսթագրամյան էջում ներողություն է խնդրել երկրպագուներից: «Սա ծանր շաբաթ էր ինձ համար, ես շատ ժամանակ չեմ քնել: Ես ոչ մի վատ բան նկատի չունեի, պարզապես բեմի դիմացի մարդիկ բոլորովին չէին ուզում լսել ինձ: Թող ինձ ներեն բոլոր նրանք, որոնց ես, հնարավոր է, հիասթափեցրել եմ»,- գրել է Բիբերը:
