Ռուսական RIA Novosti լրատվական գործակալության փոխանցմամբ՝ Թուրքիայի նախագահ Ռեջեփ Էրդողանը հայտարարել է, որ Սիրիայի հարցում տարաձայնություններ կան Անկարայի ու Մոսկվայի միջև, սակայն դրանք չի կարելի որակել որպես երկու երկրների միջև հակամարտություն։
«Մեր երկրների միջև կան տնտեսական ու ռազմավարական համագործակցության մասին համաձայնագրեր, և մենք պահպանում ենք այդ համաձայնագրերը։ Մեր միջև կարող են լինել որոշ տարաձայնություններ, սակայն դրանք չպետք է գնահատվեն որպես երկու երկրների միջև հակամարտություն։
Օրինակ, մենք կարող ենք չթույլատրել նրանց օգտագործել մեր օդային տիրույթը։ Նրանք, իրենց հերթին պետք է հարգեն մեր որոշումը։ Դրա համար էլ Ռուսաստանն ընտրել է օդային այլ տիրույթ իր պլաններն իրականացնելու համար»,- ասել է Էրդողանը։
Էրդողանը հայտարարել է, որ Ռուսաստանին իր անհամաձայնությունն է հայտնել Սիրիայում ռուսական ռազմական միջամտության համար՝ հավելելով, որ սիրիական ճգնաժամի շուրջ բանակցությունները շարունակվում են մի շարք երկրների, այդ թվում նաև Թուրքիայի ու Ռուսաստանի արտգործնախարարների մակարդակով։
«Սիրիան խաղաղության փնտրտուքի մեջ է։ Սակայն Ասադի հետ Սիրիայում չի լինի խաղաղություն։ Անհնար է առաջ գնալ մի մարդու հետ, ով դարձել է 360.000 մարդու մահվան պատճառ։ Այնտեղ պետք է ստեղծվի անցումային կառավարություն։ Հենց դա էլ հանդիսանում է մեր բանակցությունների թեման»,- հավելել է Էրդողանը։
Էրդողանի խոսքերով՝ միջազգային ահաբեկչության դեմ պայքարը հանդիսանալու է նոյեմբերին Անթալիայում կայանալիք G20-ի առաջնորդների գագաթնաժողովի օրակարգի թեմաներից մեկը։
