Երևանի գործող քաղաքապետ և ՀՀԿ ավագանու ցուցակը գլխավորող Տարոն Մարգարյանի գույքի և եկամուտների հայտարարագրում մեծ փոփոխություններ չեն եղել. նրա անշարժ, շարժական ու բանկային ֆինանսական հաշիվները նույնությամբ, առանց մեկ տառի փոփոխության պահպանվել են: Միայն անցած 1 տարում քաղաքապետարանից նրա ստացած աշխատավարձի մեծության չափն է փոխվել՝ նախորդ տարվա 4 մլն 225 հազար դրամից հասնելով 4 մլն 730 հազար դրամի: Դա էլ, ըստ ամենայնի, պայմանավորված է 2012-ի մարտին հայտարարագրի ներկայացման ժամանակ նրա պաշտոնավարման ոչ լրիվ մեկամյա ժամկետով. Մարգարյանը քաղաքապետի պաշտոնը ստանձնել էր 2011թ. նոյեմբերի 15-ին:
Այսպիսով, ԿԸՀ-ից «Առաջին լրատվական»-ին տրամադրված գույքի և եկամուտների հայտարարագրից տեղեկանում ենք, որ առանց մեկ լումայի փոփոխության պահպանվել են Տ. Մարգարյանի բանկային ֆինանսական միջոցները՝ 115 մլն դրամ, 50 հազար դոլար և 50 հազար եվրո:
Տ. Մարգարյանը 50 % բաժնեմաս ունի «Զեթ ընդ Զեթ» ՍՊԸ-ում, որը զբաղվում է մարդատար ուղևորափոխադրումներով:
Տ. Մարգարյանին են պատկանում «Մերսեդես S450» մակնիշի 2007թ. արտադրության, «Ռենջ-Ռովեր» մակնիշի 2006թ. արտադրության և «Մերսեդես Բենց G500» մակնիշի 2002թ. արտադրության մեքենաներ:
Տ. Մարգարյանը պահպանել է իր 11 անշարժ գույքի սեփականության վկայականները. 2 բնակարան՝ Ավանում (137.9 քմ) և Թումանյան փողոցի վրա (190.2 քմ), սեփական տուն՝ Ավանում (1578.3 քմ), ամառանոց՝ Ջերմուկում (258.5 քմ), առևտրի կենտրոն՝ Ավանում (մոտ 761 քմ), մոտ 3730 քմ և 44 քմ մակերեսով տարածքներ՝ Ավանում, հողամաս՝ Դիլիջանում (0.6365 քմ) և 3 ավտոտնակ՝ Ավանում:
Ի դեպ, անցած մեկ տարում Տարոն Մարգարյանի ձեռք բերած ամենամեծ հարստությունը նրա 5-րդ երեխան է:
