ՄԱԿ-ի տվյալներով՝ երկու տարի Սիրիայում շարունակվող քաղաքացիական պատերազմի հետևանքով երկիրը լքած քաղաքացիների թիվը հասել է 1.3 միլիոնի: Այս մասին հայտնում է ITAR-TASS-ը:
ՄԱԿ-ի գլխավոր քարտուղարի պաշտոնական ներկայացուցչի տեղակալ Էդուարդո Դել Բուեյը հայտարարել է, որ շուրջ 1.3 միլիոն սիրիացի է գրանցված որպես փախստական, որոնք օգնություն են ստանում հարևան երկրներում ու Հյուսիսային Աֆրիկայում: Նրա խոսքով՝ փախստականների ավելի քան կեսը լքել են Սիրիան վերջին 3 ամիսներին, որոնք ամենաարյունալին են դարձել կառավարության և ընդդիմության հակամարտության ողջ ընթացքում:
Դել Բուեյը նշել է, որ վերջին 4 շաբաթներին Փախստականների հարցերով ՄԱԿ-ի գերագույն հանձնակատարի գրասենյակը գրանցել է օրական միջինը 7000 մարդու:
ՄԱԿ-ի տվյալներով՝ 2011 թվականի մարտից երկրում հակամարտության ընթացքում զոհվել է ավելի քան 70 հազար մարդ, շուրջ 100 հազարը ստացել են վնասվածքներ:
Փախստականների հարցերով ՄԱԿ-ի գերագույն հանձնակատարի գրասենյակի տվյալներով՝ Սիրիայի բնակիչներին և հարևան երկրներում ապաստանած սիրիացիներին մարդասիրական օգնություն ցուցաբերելու համար 2013 առաջին վեց ամիսներին 519 մլն դոլար է պահանջվում: 2013-ի ապրիլի 7-ի դրությամբ՝ Սիրիայում մարդասիրական օպերացիաների համար միջազգային հիմնադրամը ֆինանսավորվել է միայն 40 տոկոսով: Դել Բուեյի խոսքով՝ միջոցների սղություն կա մարդասիրական գործունեության բոլոր ոլորտներում: