Թուրքական Pressturk.com կայքի փոխանցմամբ՝ քրդամետ «Ժողովուրդների դեմոկրատական» կուսակցության (ԺԴԿ) ներկայացուցիչ, հայազգի Գարո Փայլանը հայտարարել է, որ իրենց կուսակցական ծրագրում կետ կա ցեղասպանությունների հետ առերեսվելու մասին։
Փայլանի խոսքով՝ կետում նշված չէ «Հայոց ցեղասպանություն» արտահայտությունը, քանի որ այդ կետն առնչվում է Պոնտոսի հույների, ասորիների և մյուս ցեղասպանություններին. «Մենք ասում ենք, որ անհրաժեշտ է ձևավորել հանձնաժողովներ՝ իրականացված բոլոր ցեղասպանություններին առերեսվելու համար, և որ պետությունը պետք է ներողություն խնդրի։ Հայոց ցեղասպանության հետ առերեսվելու հետ կապված՝ կա մեր կուսակցության կոնգրեսի որոշումը, այն ներառված է կուսակցության կանոնադրությունում։
Դեմիրթաշը քանիցս արտահայտվել է այդ մասին, այդ հարցում չկա որևէ ձեռնպահ։ Կուսակցությունն ասում է, որ Հայոց ցեղասպանություն ասելով՝ քվե չի վաստակում։ Առերեսումն ընկած է մեր սկզբունքերի հիմքում։ Առանց առերեսման չենք հասնի մեր երազած ապագային։ Ըստ իս՝ մեր վերապրած աղետի անունը ցեղասպանություն է»,- ասել է Փայլանը։
