1992թ. այս օրն ադրբեջանական զինված ուժերը Լեռնային Ղարաբաղի Մարտակերտի շրջանի Մարաղա գյուղում իրականացրին ջարդ:
Ապրիլի 10-ի առավոտյան ժամը 5.00-ին սկսվեց գյուղի հրետակոծությունը: Կեսօրի մոտ ադրբեջանական «Գուրթուլուշ» վաշտը 20 զրահամեքենայի ուղեկցությամբ մտավ գյուղ: Պաշտպանական ուժերը (60 հոգի) տեսնելով, որ չեն կարող դիմադրել անհավասար ուժին նահանջեցին՝ զգուշացնելով գյուղի բնակիչներին:
Հիմնական բնակչությունը լքեց գյուղը: Ծերունիները և հաշմանդամները պատսպարվեցին նկուղներում: Հաջորդ օրը հայերը գյուղը հետ գրավեցին և գտան 43 խաղաղ բնակչի դիակ՝ մի քանիսը գլխատված էին, մյուսները այրված կամ աչքերը հանված:
Ըստ Մեծ Բրիտանիայի Լորդերի պալատի նախկին փոխխոսնակ Քերոլայն Քոքսի՝ սպանվել է 45-ից ոչ պակաս բնակիչ: Ըստ հայկական անվանական ցանկի՝ զոհվել է 57 և գերեվարվել 45 խաղաղ բնակիչ:
Գերիների թվում 9 երեխա կար, 18 կին, 3 տարեց և 1 կույր (տվյալները հաստատված են Միջազգային Helsinki Watch իրավապաշտպան կազմակերպության և Քերոլայն Քոքսի կողմից):
Մեկ շաբաթ անց նոր հարձակում է կազմակերպվել, որի հետևանքով բնակչությունը լքել է գյուղը և 13 հոգի գերեվարվել են: Ընդհանուր առմամբ՝ գյուղում զոհվել է 90, տարբեր աստիճանի վերքեր են ստացել 37 մարդ, նրանց թվում 21 կին և 6 երեխա:
Մարաղա գյուղը գտնվում է Լեռնային Ղարաբաղի հյուսիսում Միրբաշիրի շրջանի (Տերտերի շրջան) հարևանությամբ: Ըստ 1989 թվականի մարդահամարի՝ գյուղում ապրում էր 4 հազար 660 մարդ՝ հիմնականում հայ: Մինչև ապրիլի 10-ի իրադարձությունները գյուղը ենթարկվել է բազմակի հրետակոծության:
Մարաղայի կոտորածը իրագործելու համար «Գուրթուլուշ» վաշտի հրամանատար Շահին Թալիբ օղլի Թագիևը ստացել է Ադրբեջանի Ազգային հերոսի կոչում:
