ԱՄՆ ոստիկանությունը հարցաքննում է ուսանողին, որը Տեխասի քոլեջներից մեկում դանակով վնասել է 15 մարդու: Հանցագործի ինքնությունը բացահայտվել է, սակայն ոստիկանությունը առայժմ նրա անունը չի հայտնում: Հայտնի չեն նաև նրա արարքի դրդապատճառները: Այս մասին հայտնում է Vesti-ն:
Հյուսթոն քաղաքից ոչ հեռու գտնվող Լոուն Սթար քոլեջի ուսանողները դեռևս չեն կարողանում ուշքի գալ կատարվածից: Ուսումնական օրվա թեժ պահին զինված երիտասարդը առանց որևէ ակնհայտ պատճառի հարձակվել է իրեն հանդիպած բոլորի վրա: Համալիրը տարհանվել է: Անվտանգության ծառայությունները շղթայի մեջ են առել տարածքը:
Մի քանի րոպեի ընթացքում նա հասցրել է վիրավորել 15 մարդու: Ոստիկանները նրան գետնին են տապալել էլեկտրաշոկի միջոցով:
Ականատեսների խոսքով՝ հանցագործը հարվածում էր զոհերի պարանոցներին: Ծանր վիրավորված 4 մարդու հոսպիտալացրել են ուղղաթիռներով: Երիտասարդին վնասազերծելու հարցում ոստիկաններին օգնել են ուսանողները: Նրանցից մեկը լրագրողներին պատմել է, որ նա տարօրինակ երիտասարդ էր, հաճախ ձեռնոցներ էր կրում և մանկական փափուկ խաղալիքներ բերում իր հետ:
Ոստիկանությունն ուսումնասիրում է տեսահսկման խցիկների տեսագրությունները: Հայտնի է, որ նա 21 տարեկան է և գործել է միայնակ:
