«Ժառանգության» առաջնորդ Րաֆֆի Հովհաննիսյանն այժմ Բաղրամյան պողոտայում քաղաքացիների հետ սպասում է, մինչև ոստիկանությունը կբացի պողոտան և թույլ կտա երթի մասնակիցներին բարձրանալ վեր՝ Բաղրամյան 26, «մեզ պատկանող շենքի կողքով»: Ըստ Հովհաննիսյանի՝ դրանից հետո երթի մասնակիցները կվերադառնան Ազատության հրապարակ՝ «բարի գիշեր» ասելու: Իսկ ուրբաթ, ժամը 18:00-ին, հերթական հանրահավաքը կլինի և ու Ր.Հովհաննիսյանը կներկայացնի իր ծրագիրը:
«Այդ ցանկապատը պետք է ինքը բացի, ինքը իր դարպասը բացի»,- ասաց Ր.Հովհաննիսյանը՝ նկատի ունենալով Սերժ Սարգսյանին և նախագահական նստավայրը, և կոչ անելով պայքարել միայն սահմանադրության շրջանակներում:
Հարցին՝ չեք վախենո՞ւմ, որ ժողովուրդը կհիասթափվի, Ր.Հովհաննիսյանը պատասխանեց, որ ոչ մի բանից չի վախենում. «Սա մեր պայքարի գրավականը չի, բայց նաև սկզբունք է, որ սա մեր փողոցն է և հիմա սպասում ենք»:
Միաժամանակ Ր.Հովհաննիսյանը գոհունակություն հայտնեց այսօրվա հանրահավաքից: Նա նշեց, որ բազմիցս ասել է, որ ինքը փրկիչ չէ, բայց պատրաստ է պայքարել, եթե ժողովուրդը պայքարի, իսկ եթե ժողովրդին պետք է քավության նոխազ, այդ մեղավորը կարող է և ինքը լինել:
