Վրաստանի վարչապետ Բիձինա Իվանիշվիլիի հայտարարության համաձայն՝ «ապագայում էլ ամեն ինչ կարվի, որպեսզի անկախության պես կարևոր ձեռքբերումը երբեք կասկածի տակ չդրվի»: Այս մասին նա հայտարարել է խորհրդարանում՝ ի նշան 1991 թ. ապրիլի 9-ին անկախության ակտի տակ ստորագրածների հանդեպ հարգանքի:
«22 տարի առաջ, խորհրդարանի նիստերի դահլիճում ստորագրվել է Վրաստանի անկախությունը վերականգնելու մասին ակտը: Դա դեռ այն ժամանակ էր, երբ խորհրդային պետությունը դեռ գոյություն ուներ: Դա պատմական իրադարձություն էր, և որոշումը հերոսության է հավասարազոր, քանի որ կայսրությունն ամեն ինչի պատրաստ էր: Մարդիկ պատրաստ էին ցանկացած փորձության, և դա ապացուցվեց 1989 թ. ապրիլի 9-ին: Երկու տարի անց Վրաստանում հանրաքվե անցկացվեց, և վրացիները միաձայն քվեարկեցին անկախության վերականգնման համար, և մեր նորագույն պատմության մեջ կարևոր իրադարձություն տեղի ունեցավ: Այսօր խորհրդանշական օր է, այս դահլիճում ներկա են մարդիկ, ովքեր ստորագրել են անկախության ակտը: Հատկապես ցանկանում եմ հիշել այս ամենի հեղինակին՝ Զվիադ Գամսախուրդիային, ինչպես նաև այս ակտը ստորագրած այն մարդկանց, ովքեր այսօր կենդանի չեն:
Ցանկանում եմ կրկին նշել, որ 22 տարի առաջ կարևորագույն ակտ է ստորագրվել, և դա այն ամենի սկիզբն էր, ինչը մենք այսօր պատկերացնում ենք: Այս տարիների ընթացքում, չնայած տաբեր վտանգներին, ոչ ոք կասկածի տակ չի դրել այդ կարևորագույն պատմական իրադարձությունը, և ապագայում էլ մենք կանենք ամեն ինչ, որպեսզի անկախության պես կարևորագույն ձեռքբերումը կասկածի տակ չդրվի», -նշել է Իվանիշվիլին:
