Այսօր մամուլում հայտնվել են ամերիկյան դիվանագիտության` Գուանտանամոյի բանտին վերաբերող փաստաթղթեր, որոնք հրապարակել է Wikileaks կայքը:
Այդ փաստաթղթերում տրված են գրեթե բոլոր բանտարկվածների բնութագրերը, ինչպես նաև մոտ 700 հարցաքննությունների վերաբերյալ զեկույցներ: Փաստաթղթերում նշվում է, որ յուրաքանչյուր բանտարկյալ կարևոր նշանակություն է ունեցել քննության համար, իսկ տեղեկություն ստանալու համար կասկածյալները հաճախ խոշտանգման են ենթարկվել:
Փաստաթղթերում նշվում է, որ բանտարկյալներից մեկը պատրաստվում էր մահափորձ կատարել Պակիստանի նախագահ Փերվեզ Մուշարաֆի դեմ, իսկ ԱՄՆ ռազմածովային ուժերի նավը պայթեցնող Աբդ Ալ-Ռահիմ Ալ-Նաշիրին հատուկ դեղամիջոցներ է օգտագործել` իմպոտենցիա առաջացնելու և կանաց վրա ավելորդ ուշադրություն չդարձնելու համար:
Փաստաթղթերուն նաև նշվում է բանտարկյալների վտանգավորության աստիճանը, ինչը տասնյակ դեպքերում չի ապացուցվել: Ընդ որում, փաստաթղթերից շատերում ենթադրություններ են արվում, իսկ «հնարավոր է» արտահայտությունն օգտագործվում է 387 անգամ:
Ակնկալվում է, որ այս փաստաթղթերի հրապարակումը նորից բուռն քննարկումների առիթ կհանդիսանա, իսկ ԱՄՆ նախագահ Բարաք Օբամային հերթական անգամ կմեղադրեն նախընտրական խոստումը չկատարելու և Գուանտանամոն չփակելու համար:
