Հնդկաստանում մահապատժի է դատապարտվել Սանթուշ Մանեն՝ ավտոբուսի վարորդ, որը 2012թ. հունվարին Պունա քաղաքում մահվան ելքով վրաերթի է ենթարկել 9 մարդու և վնասվածքներ պատճառել ևս 37-ին՝ հաղորդում է The Times of India-ն:
Մանեն մեղավոր էր ճանաչվել կանխամտածված սպանության, սպանության փորձի, գործատուի ունեցվածքի գողության և վնաս պատճառելու համար: Դատարանը որոշել է, որ վարորդը գիտակցաբար է գործել և միտումնավոր է վրաերթի ենթարկել մարդկանց:
2012թ. հունվարի 25-ին Մանեն, գողանալով դատարկ ավտոբուսը, որը պետք է վարեր իր գործընկերը, դուրս է եկել քաղաքի փողոցներ: Շուրջ 45 րոպե նա վարել է քաղաքում՝ փորձելով վարերթի ենթարկել ինչքան հնարավոր է շատ մարդկանց: Նրա գործողությունների հետևանքով զոհվել է 9 մարդ, վիրավորվել՝ 37-ը: Բացի այդ, վարորդրը վնասել է ավելի քան 10 ավտոմեքենա:
Ոստիկանությունը հետևել է Մանեին և կրակել նրա ավտոբուսի վրա, սակայն նրան հնարավոր է եղել կանգնեցնել քոլեջի ուսանողի շնորհիվ: Նա կարողացել է բարձրանալ ավտոբուս և վնասազերծել հանցագործին:
Սանթուշ Մանեն, որն այժմ 39 տարեկան է, պետական տրանսպորտային ընկերությունում 11 տարի աշխատել է որպես ավտոբուսի վարորդ: Դատարանում պարզվել է, որ հանցագործությունը կատարելու նախօրեին նա ղեկավարությունից խնդրել է կրճատել իր աշխատաժամերը, սակայն նրան մերժել են:
