ՀՀ արտահանմանն ուղղված արդյունաբերական քաղաքականության ռազմավարությամբ ընտրված ոլորտներից են նաև ոսկեգործության, ադամանդագործության և ժամագործության ոլոտները: Այս մասին այսօր լրագրողների հետ հանդիպման ժամանակ հայտնեց էկոնոմիկայի փոխնախարար Տիգրան Հարությունյանը: Ըստ նրա՝ ստեղծվել է ոլորտային խորհուրդ, մշակվել է ռազմավարությունը, 2013-2015 թթ. գործողությունների ծրագիրը:
Տ. Հարությունյանը հայտնեց, որ ներկայում ոլորտում գործում են 38 կազմակերպություններ, որից 32-ը՝ ոսկեգործության, 6-ը՝ ադամանդագործության մեջ, ունենք ոսկեգործության բրենդ: Ըստ նրա՝ անցած տարի ոլորտը տվել է 13.3 մլրդ դրամի արտադրանք, որի մեծ մասն արտահանվել է։ Արտադրության աճի տեմպերը կազմել են 16 %:
Արդյունաբերության զարգացման հիմնադրամի տնօրեն Հայկ Միրզոյանը հայտնեց, որ ոլորտային ռազմավարությունը մոտ ժամանակներս կներկայացվի վարչապետին կից արդյունաբերական խորհրդին: Նա նշեց, որ ազատ տնտեսական գոտու ստեղծման ուղղությամբ համագործակցում են «Հայ ոսկերիչների միության» հետ, և արդեն «շոշափելի քայլեր կատարվել են»:
«Հայ ոսկերիչների միության» (AJA) և «Ռուսաստանի ոսկերիչների գիլդիայի» նախագահ Գագիկ Գևորգյանի խոսքերով՝ ազատ տնտեսական գոտու հիմնական խնդիրը բիզնեսմեններին ՀՀ բերելն է, որովհետև չեն ուզում գալ՝ մինչև չիմանան, թե ինչ է իրենց սպասվում: Նա նշեց, որ հսկայական աշխատանք են անում բանակցությունների միջոցով. «Ազատ տնտեսական գոտին միայն հայ գործարարների համար չի: Ամենակարևոր հաղթանակը այս հարցում մարդկանց համոզելն է, որ, օրինակ, Չինաստանում արդեն գործող գործարանը փակեն, գան ՀՀ: Մրցակցության առումով Հայաստանն ավելի գրավիչ տեղ է, որովհետև աշխատավարձն այստեղ ավելի ցածր է, քան նույնիսկ Չինաստանում: Եվ հետո՝ դեպի Եվրոպա ճանապարհի տևողությունը ավելի կարճ է»:
Գևորգյանը նշեց, որ բանակցությունների հիմնական մասն արդեն ավարտված է, իրենց նպատակն էր մեկ տարում մոտ 1000 աշխատատեղ ստեղծելը: Մեկ տարուց ավելի ոսկերիչները կորցրել են Էդուարդո Էռնեկյանի հետ օդանավակայանի նախկին շենքը զբաղեցնելու շուրջ բանակցությունների պատճառով, բայց վերջում մերժվել են: Մերժվել է նաև Մերգելյանի ինստիտուտում տեղ հատկացնելու նրանց դիմումը:
«Մենք տեղ չունենք, դրսի բիզնեսմեն ենք, տեղ տվեք՝ գանք աշխատենք: Մոտ 20 հզ. ք/մ շենք է պետք, բայց նաև հետագա զարգացման համար է տեղ պետք»,- ասաց Գևորգյանը՝ հավելելով, որ ՀՀ նախագահի երդմնակալության հաջորդ օրը հանդիպելու է Սերժ Սարգսյանի հետ:
