Կիրակի Եգիպտոսի երկաթուղային հաղորդակցությունը ամբողջությամբ կաթվածահար է եղել մեքենավարների գործադուլի պատճառով: Ինչպես հաղորդում է ITAR-TASS-ը, երկրի ամբողջ տարածքում դադարեցվել է գնացքների երթևեկութոյւնը, հազարավոր ուղևորներ չեն կարողացել հասնել նշանակման կետերին: Իրավիճակն ինչ-որ չափով կարգավորելու համար շատ շրջանների իշխանություններ գործարկել են միջքաղաքային ավտոբուսներ:
Աշխատակիցների հիմնական պահանջներն են ՝ աշխատավարձի բարձրացում, հավելյալ աշխատաժամերի փոխհատուցում և հանգստյան օրեր: Բացի այդ՝ գործադուլ հայտարարած մեքենավարները պահանջել են միջոցներ ձեռնարկել ճանապարհների անվտանգությունը բարձրացնելու համար, քանի որ վերջին մի քանի ամիսների ընթացքում տեղի են ունեցել մի շարք խոշոր ավտովթարներ:
Դեռևս նախորդ շաբաթ Եգիպտոսի տրանսպորտի նախարարի հետ բանակցություններում արհմիությունները մի շարք առաջարկներ են արել՝ տվյալ ոլորտում աշխատող եգիպտացիների սոցիալ-տնտեսական դրությունը բարելավելու և անվտանգությունն ամրապնդելու համար: Սակայն բանակցությունները որևէ արդյունք չեն տվել:
Մեքենավարները պահանջել են երկաթուղու ազգային վարչության ղեկավար Հուսեյն Զաքարիի հրաժարականը: Տրանսպոտի նախարարությունն ի պատասխան՝ ակտիվիստներին զգուշացրել է, որ եթե նրանք չվերսկսեն աշխատանքը, ապա նրանց գործերով կզբաղվի գլխավոր դատախազությունը:
