Սիրիական բանակն ու Իրանի և «Հըզբոլլահի» կոալիցիան նախապատրաստվում են Հալեպում գրոհայինների վրա զանգվածային հարձակման՝ հայտարարել են տեղի իշխանությունների ներկայացուցիչները։ Այս մասին փոխանցում է Reuters գործակալությունը։
Հարձակումը կիրականացնեն նույն մարտիկները, ովքեր մեկ շաբաթ առաջ մասնակցել են Համա նահանգում ապստամբների հետ բախումներին։ Տեղի իշխանությունների աղբյուրը հստակեցրել է, որ հարձակմանը մասնակցելու համար Իրանից ժամանել են հազարավոր զինվորներ՝ աջակցություն ցուցաբերելու նախագահ Ասադին։
Հաղորդվում է, որ մարտի նախապատրաստությունն այդ տարածքում մոտեցել է ավարտին, ներկա պահին մոբիլիզացվում են Սիրիայի բանակի ողջ ուժերը, «Հըզբոլլահի» առավել մարզված մարտիկները, իսկ առանցքային դերը կտրվի իրանցի զինվորներին։ Նշվում է, որ հարձակումը կսկսվի առաջիկայում։
