Ռոնա Պոլի խաղաղության ու զարգացման ամերիկյան ինստիտուտը հրապարակել է հետազոտություն, որի համարձայն Toyota մակնիշի հարյուրավոր ամտոմեքենաներ հայտնվել են ԴԱԻՇ-ի տրամադրության տակ` ԱՄՆ-ի և Մեծ Բրիտանիայի մատակարարումների շնորհիվ:
Իրաքում, Լիբիայում և Սիրիայում ԴԱԻՇ-ի գտնվելու վայրի բազմաթիվ տեսագրություններում երևում են հազարավոր Toyota մակնիշի ավտոմեքենաներ` ամենագնացներ, թեթև բեռնատարներ Toyota Hilux, Toyota Tacoma և Toyota Land Cruiser:
Ինչպես հայտնում է Informator-ը՝ ավելի վաղ այդ առիթով ԱՄՆ-ի ֆինանսների նախարարության հակաահաբեկչական դեպարտամենտը պաշտոնական հարցադրումով դիմել է Toyota ընկերությանը և խնդրել պարզել, թե ինչպես է ահաբեկչական խմբավորմանը հաջողվել գնել այդ Toyota-ները, քանի որ ավտոկոնցեռնի կողմից մեքենաների պաշտոնական մատակարարումը Սիրիա դադարեցվել է 2012 թվականին:
Քաղաքագետների հետազոտության համաձայն` ֆինանսների նախարարությունը պետք է բացատրություն ստանալու համար դիմեր ԱՄՆ-ի պետդեպարտամենտին և Մեծ Բրիտանիայի կառավարությանը, որոնք 2013-14 թվականներին այդ ջիպերը մատակարարել են Բաշար Ասադի ռեժիմի դեմ պայքարող «Սիրիական ազատ բանակին»:
Toyota ընկերությունը պնդում է, որ ավտոմեքենաների պաշտոնական մատակարարումը Սիրիա դադարեցվել է 2012 թվականին: Toyota-ի հասարակայնության հետ կապերի տնօրեն Էդ Լյուիսը հայտարարել է, որ ընկերությունում գոյություն ունեն խիստ կանոններ, ըստ որոնց չի կարելի ավտոմեքենաներ վաճառել նրանց, ովքեր կարող են այն օգտագործել կամ ձևափոխել ռազմական նպատակներով կամ ահաբեկչական գործունեության համար: Սակայն, գործնականորեն անհնար է պահեստ-գնորդ գործընթացում ամբողջովին վերահսկողություն իրականացնել, քանի որ այդ ճանապարհին դրանք կարող են գողանալ, գնել կամ վերավաճառել միջնորդներին:
