Հոկտեմբերի 13-ին ոստիկանության Երևան քաղաքի վարչությունում տեղի է ունեցել աշխատանքային խորհրդակցություն, որը վարում էր ոստիկանության պետ Վլադիմիր Գասպարյանը:
Ինչպես հայտնում են ՀՀ ոստիկանությունից, քննարկվեցին ոստիկանության Երևան քաղաքի վարչության ու ենթակա բաժինների 2015 թվականի ինն ամիսների գործունեության արդյունքները, որոնք ներկայացրել է վարչության պետ Աշոտ Կարապետյանը:
Վլադիմիր Գասպարյանը հիմնականում դրական է գնահատել մայրաքաղաքի ոստիկանների աշխատանքը՝ միաժամանակ ուշադրություն հրավիրելով ծառայության մեթոդաբանությունը մշտապես կատարելագործելու և արդիականացնելու անհրաժեշտությունը:
Ոստիկանության պետը կրկին կարևորել է գործնական պարապմունքների նշանակությունը, հատկապես երիտասարդ կադրերի պատրաստության, նրանց նախորդ սերնդի փորձը հաղորդելու, ժամանակակից ոստիկանի ձևավորման գործընթացում:
Վլադիմիր Գասպարյանը բարձրացրել է ոստիկանության աշխատանքը սկզբունքորեն վերափոխելու խնդիրը՝ ընդգծելով, որ չկան ի սկզբանե պատրաստ լուծումներ, և ոստիկանն իր գիտելիքների ու պատրաստականության շնորհիվ միայն կկարողանա արդյունավետ գործել բոլոր իրավիճակներում:
Վլադիմիր Գասպարյանը կարևորել է անչափահասների հանցավորության դեմ պայքարի արդյունավետությունը բարձրացնելու առաջնահերթությունը՝ նկատելով, որ չնայած դեռահասների հետ տարվող ծավալուն աշխատանքին և դպրոցական տեսուչի ինստիտուտի կայացմանը, կոնկրետ օպերատիվ աշխատանքը անչափահասների շրջանում կատարելագործման կարիք ունի, ինչին կարելի է հասնել հիմնվելով նաև ոստիկանության վետերանների վրա, որոնք այսօր չափազանց օգտակար ու գնահատելի գործ են կատարում:
Ամփոփելով խորհրդակցությունը՝ Վլադիմիր Գասպարյանը կոնկրետ ցուցումներ ու հանձնարարականներ է տվել ստորաբաժանումների ղեկավարներին:
