ՌԱՀՀԿ տնօրեն Մանվել Սարգսյանի կարծիքով՝ թուրքական ռազմական ուղղաթիռների կողմից հայ-թուրքական օդային սահմանը հատելը կապված է Ռուսաստանի՝ Սիրիայում վարած նոր քաղաքականության հետ. «Մենք տեսնում ենք, որ Թուրքիայում և Թուրքիայի շուրջ շատ ինտենսիվ կերպով նոր բարդություններ են ստեղծվում, և այդ երկիրը դարձել է մի նոր քաղաքականության թիրախ: Պատահական չէ ռուսական ինքնաթիռների ներխուժումը Թուրքիայի տարածք: Այստեղ էլ Թուրքիան մի ժեստ արեց՝ իր ուղղաթիռներն ուղարկելով՝ բարդացրեց իրավիճակը»:
Հարցին՝ արդյոք ՀԱՊԿ-ն այս դեպքում պե՞տք է որևէ գործողություն իրականացներ, քանի որ Հայաստանի անվտանգության երաշխավորն է, և թուրքական ռազմական ուղղաթիռները ներխուժել են Հայաստանի տարածք, Մանվել Սարգսյանն արձագանքեց. «10 օր առաջ ՀԱՊԿ-ը ի վերջո հստակեցրեց իր վերաբերմունքը Հայաստանի խնդիրների նկատմամբ: Նիկոլայ Բորդյուժան պարզ ասաց, որ Հայաստանն ի վիճակի է ինքն իրեն պաշտպանելու, երբ չկարողանա պաշտպանել՝ թող դիմի, ՀԱՊԿ-ը կորոշի՝ օգնել կամ ոչ: Դա պարզ, հստակ դիրքորոշում է. ՀԱՊԿ-ն ասում է՝ գնացեք ձեր հարցերն ինքնուրույն լուծեք: Չեմ ասի, թե դա վատագույն տարբերակն է, բայց նման միջազգային իրավիճակում, երբ իրար հակադրվում են շատ պետություններ, մի կողմում լինելը շատ կարևոր հանգամանք է: Այսօր Հայաստանին ՀԱՊԿ-ը պետք է նայի որպես առանձին գործոնի, որն իր ինքնուրույն քաղաքականությունն է վարում: ՀԱՊԿ-ին պետք է նայել այնպես, ինչպես Ռուսաստանին, Թուրքիային, Ադրբեջանին՝ գործող մի օղակ է, որն իր քաղաքականությունն է վարում»,- ընդգծեց Մանվել Սարգսյանը:
