Պակիստանի հյուսիսարևմտյան Չիտրալ քաղաքի ընտրական հանձնաժողովն այսօր որոշել է երկրի նախկին նախագահ, գեներալ Պերվես Մուշարաֆին թույլ տալ մասնակցելու մայիսի 11-ին կայանալիք համընդհանուր ընտրություններին: Այս մասին հայտնում է RIA Novosti-ն՝ հղում անելով պակիստանյան ԶԼՄ-ներին:
«Նրա փաստաթղթերը կարգին վիճակում են: Դատարանը նրա դեմ դատավճիռ չի կայացրել, այդ իսկ պատճառով մենք չենք կարող մերժել նրան»,- հայտարարել է ընտրական հանձնաժողովի անդամ Ջամալ Խանը:
Գեներալի հայրենի Կարաչի քաղաքի ընտրական հանձնաժողովը մերժել է նրա թեկնածությունը: Հանձնաժողովը բավարարել է նրա մրցակիցների միջնորդությունը, համաձայն որի՝ նախկին նախագահը չի կարող առաջադրվել, քանի որ 2007 թվականին, սահմանելով արտակարգ դրություն, խախտել է Սահմանադրությունը: Ավելի վաղ նրան մերժել էին Պենջաբ գավառի Կասուր շրջանում:
Գեներալ Մուշարաֆը Պակիստանում իշխանության է եկել 1999 թվականին՝ ռազմական հեղաշրջման արդյունքում, և լքել պաշտոնը 2008 թվականին, երբ ընդդիմադիր կուսակցությունները սպառնացին նրան իմփիչմենթով: Նա բնակություն էր հաստատել Լոնդոնում: 2013-ի մարտի վերջին Մուշարաֆը Պակիստան է վերադարձել: Նա գլխավորում է Համապակիստանյան մուսուլմանական լիգան:
Նշենք, որ նրան մեղադրում են 2006-ին Բելուջիստան գավառի ազգայնականների առաջնորդ Ագբար Բուգտիի և 2007-ին երկրի նախկին վարչապետ Բենզիր Բհուտտոյի սպանության մեջ:
