«Անի Պլազա» հյուրանոցում մեկնարկած «Սահմանադրական Բարեփոխումները Հայաստանում» թեմայով քննարկմանը ԱԺ ՀԱԿ խմբակցության պատգամավոր Լևոն Զուրաբյանը նշեց. «Գնահատական տալու համար նախ պետք է ինչու հարցը տանք՝ հասկանալու սահմանադրական փոփոխությունների պատճառահետևանքային կապը: Ինչո՞ւ պետք է Հայաստանը փոխի կառավարման ձևը, չէ՞ որ յուրաքանչյուր դեմոկրատական երկրում գիտեն, որ կառավարման ձևը փոխել չի կարելի, դա խաղի սուրբ կանոններն են, որոնց պետք է ենթարկվի քաղաքական վերնախավը:
Ինչու հարցը ծագում է նաև այն ժամանակ, երբ որ փորձում ենք հասկանալ Սերժ Սարգսյանի մոտիվները: Սերժ Սարգսյանը այն մարդն է, որ կողմ է եղել կիսանախագահական համակարգին, ի՞նչ պատահեց, որ նա հանկարծ որոշեց փոխել կառավարման մոդելը: Վենետկի հանձնաժողովը հստակ ասում է, որ դեմոկրատիայի տեսակետից որևէ տարբերությանուն չկա կառավարման այդ երեք մոդելների միջև: Կառավարման մոդելի փոփոխությունը արտակարգ մի բան է, որ կարող է լինել, եթե քաղաքական ուժերի մեջ, նաև հանրության մեջ կա կոնսենսուս դրա շուրջ:
Սերժ Սարգսյանը, դիմելով Գագիկ Ծառուկյանին, ասաց, որ քաղաքականությունը կրկես չէ, պետք է լքեք քաղաքականությունը. ԲՀԿ-ից 500 մարդ ձերբակալվեց, և խաղի վերջնամասում Գագիկ Ծառուկյանը ուղղակի լքեց քաղաքականությունը, իսկ ԲՀԿ-ն հնազանդվեց իշխանությանը, ահա այսպես է ձեռք բերվել կոնսենսուսը, որը իրականում գոյություն չունի: Սերժ Սարգսյանը ունի միայն մեկ պատճառ այս ռեֆորմը կատարելու. նա հույս ունի, որ կշարունակի իր իշխանությունը Հայաստանում:
«Ի՞նչ է, սո՞ւրբ եք գտել,- ասաց Զուրաբյանը՝ անդրադառնալով Գագիկ Հարությունյանին,- Գագիկ Հարությունյանն այն մարդն է, ում խոստացել են, որ նոր Սահմանադրությամբ նա կունենա նախագահի պաշտոն, և նա մոռանալով իր ամենագլխավոր առաքելությունը՝ ինքն է լծվել սահմանադրության համակարգի խախտման գործին»:
